பொதுமேடை

டாக்டர் ராமதாசும் சரி அன்புமணியும் சரி பாட்டாளி மக்கள் கட்சி வன்னியர் சாதிக்கு அப்பாற்பட்டது என்று நிரூபிக்க பாடாய்ப் பட்டார்கள்.     முடிந்ததா?

வன்னியர் சங்கத் தலைவர் காடுவெட்டி குருவை பக்கத்தில்  வைத்துக் கொண்டு மற்ற எல்லா சாதியினரும் எங்களை ஏற்றுக் கொள்ளுங்கள் என்று சொன்னால் யார் வருவார்கள்.

எல்லா தனித் தொகுதிகளிலும் வேட்பாளர்களை  பா ம க சார்பில் நிறுத்தினீர்கள்.  பாராட்டு.     அந்த மக்கள்  ஒட்டு போட்டார்களா?   ஏற்றுக் கொண்டார்களா?

எல்லா சாதி வேட்பாளர்களையும்  நிறுத்தினீர்கள் .     எந்த சாதியும் உங்களை நம்ப வில்லையே?

பணத்தை நம்பாமல் செயல் திட்டங்களை முன் நிறுத்தினோம் என்றீர்கள்.  சரி. நீங்கள் செலவு செய்த நூற்றுக்கணக்கான கோடிகள் உங்களுக்கு எப்படி வந்தது என்ற கேள்வி எழுந்ததே?   மக்களுக்கு விளக்கம் அளித்தீர்களா?

கடைசி வரை எங்களுக்கு யாரும் தேவையில்லை என்று  நீங்கள் பேசியது நம்பிக்கையா அகங்காரமா?

நடந்தது ஒரு தேர்தல்  யுத்தம்.     அதில்  நியாய அநியாயங்கள் பேசிக் கொண்டு எதில் வெல்ல விரும்புகிறீர்கள்.?   இங்கு வெற்றி   தோல்வி மட்டுமே கணக்கிடப்படும்.

நீங்களும் பணம் கொடுத்து வெல்ல முயற்சி செய்யுங்கள் என்று சொல்ல வில்லை.

தெரிந்தே தோற்க முயற்சித்தது ஏன் என்பதே கேள்வி.

உங்களால்  தி மு க வின் வெற்றியை தடுக்க முடிந்திருக்கிறது.     யார் வந்தால் என்ன என்று நீங்கள சொல்வீர்களே ஆனால் உங்களுக்கும் பணம் வாங்கிக்கொண்டு விஜயகாந்தை தி மு க பக்கம் செல்லாமல் பார்த்துக்  கொண்டதாக குற்றம் சாட்டப்படும் வைகோவுக்கும் என்ன வேறுபாடு?

யதார்த்தத்தை கணக்கில் எடுத்துக்கொள்ளவே மாட்டோம் என்று உறுதிமொழி எடுத்திருக்கிறீர்களா?

உங்கள் அணுகுமுறையில் மாற்றம் வருமா  வராதா ?

வடக்கு மாவட்டங்களை தவிர உங்களுக்கு தமிழகத்தில் எங்கும் சுயேச்சைகளுக்கு இருக்கும் மரியாதைதான் என்று தெரிந்த பின் என்ன செய்யப் போகிறீர்கள்?

தோல்விக்கான  காரணங்களை ஆராய்ந்து பார்க்கவே மாட்டீர்களா?

குறைந்த பட்சம் சீமானோடும் திருமாவளவனோடும் கிருஷ்ணசாமி     யோடும்  இதர ஒத்த கருத்தை கொண்ட  தமிழர் தலைவர்களோடும் நீங்கள் ஒத்துப்  போக முடியுமா என்று ஆராய்ந்து பாருங்கள்.!

யாருமே வேண்டாம் நானே தலைவன் என்று தொடர்ந்து சொல்லிக் கொண்டிருந்தால் வரலாறு உங்களை மன்னிக்கவே மன்னிக்காது.

ஜெயலலிதா – மமதா இருவருக்கும் பல ஒற்றுமைகள் உண்டு.

இருவரும் பிராமணர்கள் அதாவது பார்ப்பனர்கள்.    ஆனால் அதை வெளியே காட்டிக் கொள்ள மாட்டார்கள்.     ஊடகங்களும் அதை வெளிப்படுத்தி  எழுத மாட்டார்கள்.  ஆனால் ஜெயலலிதா  மட்டும் ” ஆமாம் , நான் பாப்பாத்திதான் ” என்று சட்ட மன்றத்திலேயே சொல்லிக் கொண்டவர்.

ஊடகங்கள் எல்லோரும் , மற்றவர்கள் யாராக இருந்தாலும் அவர்களுக்கு சாதி முத்திரை குத்துவதில் முனைந்து  நிற்பார்கள்.        ஆனால்  பார்ப்பனத் தலைவர்களுக்கு மட்டும் சாதி முத்திரையை தவிர்ப்பார்கள்.

இருவருமே திருமணம் செய்து கொள்ளாதவர்கள்.         ஜெயலலிதாவை பற்றியாவது எம்ஜியாரைஇணைத்தும் சோபன் பாபுவோடு இணைத்தும் செய்திகள் வந்தது.    எம் ஜி யார் இறந்த போது தான் உடன்கட்டை ஏறுவதை சிந்தித்ததாக ஜெயலலிதாவே கூறினார்.   ஆனால் மம்தாவை பற்றி அதுபோல் ஏதும் செய்திகள் இல்லை.

இருவருமே ரத்த சொந்தங்கள் யாரையும் அரசியல் அதிகாரத்தில் இணைத்துக் கொள்ள வில்லை.

அதனால்தான்  எனக்கு யார் இருக்கிறார்கள் .    எல்லாமே நீங்கள்தான் என்று பேச ஜெயலலிதாவால்  பேச முடிகிறது.

எம் ஜி ஆரிடம் ஜெயலலிதா கற்றுக் கொண்ட பலவற்றில் இது முக்கியமானது.    அவரும் தன் சொந்தங்களை அரசியலுக்குள் கொண்டு வரவில்லை.

இறந்த போதும் தன் சொத்துக்களை அறக்கட்டளை ஏற்படுத்தி தமிழ் மக்களுக்கு நன்மை கிடைக்கும்படி செய்து வைத்தார்.

அதனால்தான் அவரை பொன் மனச் செம்மல் என்று அழைத்தார்கள்.

ஜெயலலிதா போல் மம்தாவின் பேரில் சொத்து குவிப்பு என்றெல்லாம் வழக்குகள் இல்லை.  சாரதா மற்றும் நாரதா சிட் பண்ட் ஊழல்களில் மமதா சிக்கவில்லை.    ஜெயலலிதா மூன்று முறை தண்டணை  பெற்றவர்.   இப்போது விடுதலையாகி  அதன் மேலான மேன் முறையீட்டில் விசாரணையில் இருப்பவர்.

இருவரும் அசுரத்தனமாக தங்கள் கட்சிகளை கட்டுப்பாட்டில் வைத்திருப் பவர்கள்.

எட்டி உதைத்தாலும் மிதித்தாலும் யாரும் சத்தம் போட்டு அழுவது கூட இல்லை. ஏனென்றால் மீண்டும் அழைப்பார் என்ற எதிர்பார்ப்பு.

ஆனால்  இங்கு  உள்ளது போல் எல்லாரையும் தன் காலில்  விழ  வைத்து அதில் மகிழ்ச்சி காண்பவர் என்ற குற்றச்சாட்டு மமதா பேரில் இல்லை.

யாரை எப்போது தூக்குவார்கள் யாரை எப்போது இறக்குவார்கள் என்பது அவர்கள் இருவருக்குமே  தெரியாது.

எனவே இரும்பு பெண்மணிகள் என்ற முத்திரை இருவர் மீதும் .

எல்லா சாதிகளையும் அடக்கி ஆள்வதில் இருவரும் வெற்றி பெற்றிருக்கிறார்கள்.

பணபலம் இருவருக்கும் பொதுவானது.     ஆனால் இங்கு சசிகலா குடும்பத்தினர் இருப்பது போல் அங்கு இருப்பது போல் தெரியவில்லை.

மம்தாவை விட ஜெயலலிதாவுக்கு கூடுதல் சிறப்பு ஒன்று உண்டு.

அதுதான் திராவிட இயக்கத்தின் மூல வேரான பிராமணீய எதிர்ப்பு கொள்கையை ஏற்றுக் கொள்ளாதவராக இருந்தும் தானே பிராமணராக இருந்தும்  அந்த இயக்கத்தின் தலைமையை ஏற்றுக் கொண்டு அதன் மூல வேரை மெல்ல மெல்ல சாகடித்துகொல்லும் பணியை திறம்பட செய்து வருவது.

வெற்றி பெற்றதும் பெரியார் அண்ணா எம்ஜியார் படங்களுக்கு மரியாதை செலுத்தினார்.

அண்ணா வாவது ஒன்றே குலம் ஒருவனே தேவன் என்றார்.      பெரியார்

நாத்திகராயி ற்றே .   திமுக – அ திமுகவில் உள்ளவர்கள் எல்லாரும் நாத்திகர்கள் அல்ல.

ஆனால் தலைமை தாங்குகிறவர்  சாதி ஒழிப்பில்  நம்பிக்கை கொண்டிருக்க வேண்டுமா இல்லையா?    ஆனால் ஜெயலலிதா   அப்படியா?      அனைத்து சாதியினரும் அர்ச்சகராகலாம் என்ற சட்டம் உச்ச நீதி மன்றத்தால் செல்லும் என்று தீர்ப்பளிக்கப் பட்ட பிறகும் அர்ச்சகர் பயிற்சி  சான்றிதழ் பெற்றவர்களுக்கு  வேலை கொடுக்க மறுக்கிறாரே?

தமிழர்கள் தங்களுக்குள் ஒருவரை தலைவராக ஏற்றுக் கொள்ள ஒருபோதும் ஒப்புக் கொள்ள மாட்டார்கள்.     ஆனால் தமிழர் அல்லாதவரை எல்லாரும் ஏற்றுக் கொள்வார்கள்.   ஏனென்றால் சக தமிழன் வரவில்லையே .   அது போதும் ??!!

எல்லாரையும் ஏற்றுக்கொள்ள வைக்க வேண்டும் என்பதில் இருவருமே கவனம்  செலுத்து பவர்கள்.

பார்ப்பனர்  மீது பொறாமை கொண்டால் மட்டும் போதாது.  பழி சுமத்தினால் மட்டும் போதாது.   அவர்களைப்போலவே தன்னலம்  இல்லாதவர்கள் போல் காட்டிக் கொள்ள தெரிய வேண்டும்.

ரத்த சொந்தங்களுக்கு அதிகார பூர்வமாக  இடம் கொடுக்காமல் இருக்க வேண்டும்.

பார்ப்பனர்களை நம்பக் கூடாது என்றாலும்  பொது வாழ்க்கையில் அவர்களைப் பின் பற்றுவதே வெற்றிக்கான வழிகள்.

தமிழகத்தில் ஆட்சி மாற்றம் நிச்சயம் என்றே கருத்துக் கணிப்புகள் தெரிவிக்கின்றன.

நாளை தெரிய வரும் முடிவில்தான் தமிழகத்தின் தலைஎழுத்து இன்னும் ஐந்து ஆண்டுகளுக்கு நிர்ணயிக்கப் படும்.

மதுவின் ஆதிக்கம் இல்லாத,    ஊழல் கரை படாத ,     மக்களோடு மக்களாக  கலந்து அவர்களின் துயரங்களை போக்கக்கூடிய ஒரு லட்சிய ஆட்சியை மக்கள் எதிர்பார்க்கின்றனர்.

அத்தகைய ஆட்சியை தி மு க தரும் என்றும் அதன் கடந்த கால தவறுகள் மீண்டும் தலைஎடுக்காது  என்றும் மக்கள் எதிர்பார்க்கின்றனர் .

தமிழக அரசியலையே தூய்மைப் படுத்த வேண்டிய கடமையும் கூட தி மு க வுக்கு உண்டு.

ஏனென்றால் கலைஞர் அடிக்கடி கூறுவது போல் தி மு க ஒரு சாதாரண அரசியல் கட்சி மட்டும் அல்ல.    அது ஒரு சமுதாய இயக்கம்.

திராவிட இயக்க கட்சியையே  ஜெயலலிதா கடத்திக் கொண்டு போய் சனாதனக் கட்சியாக மாற்றி விட்டார்.      அண்ணா கட்சியாகவும் எம் ஜி ஆர் கட்சியாகவும் இல்லாமல் முற்று முழுதாக ஜெயலலிதா வகுத்த  ” கொள்ளையடி ,  பகிர்ந்து கொடு, பதுக்கு ,  வாக்குக்களை விலைக்கு வாங்கு , மீண்டும் கொள்ளையடி ” என்ற  கொள்கைதான் அ தி மு க வின் கொள்கை என்றாகி விட்டது.

கட்சி என்று அம்மா கட்சியானதோ அன்றே அங்கு கொள்கைக்கு இடமில்லை என்றாகி விட்டது.

எப்போதாவது பெரியார்  அண்ணா கொள்கைகளை,  சுயமரியாதை கொள்கைகளை ஜெயலலிதா பேசியதுண்டா ?       பிறந்த  நினைவு  நாட்களில் சம்பிரதாயமான மாலை அணிவித்தல் என்ற சடங்கை தவிர மறந்தும் எங்கும் அவர்களின் கொள்கைகளை  பற்றி ஜெயலலிதா பேசியதே இல்லை.    ஏனென்றால் அவற்றில் அவருக்கு உடன்பாடு இல்லை.   அதை நாணயமாக ஒப்புக்கொள்ளும் தைரியமும் அவருக்கு இருந்தது இல்லை.

தன்னை சுய பரிசோதனை செய்து கொள்ளும் ஆற்றல் தி மு க வுக்கு உண்டு.    அதிலும் குறிப்பாக ஸ்டாலின் தற்கால தலைமுறை தலைவர்கள் வரிசையில் கண்ணியம் மிக்க தலைவராக ஏற்றுக் கொள்ளப் பட்டிருக்கிறார் .

நம்பிக்கைதான் வாழ்க்கை!       நாளை விடியும் என்று நம்புவோம்??!!!

,

திருப்பூர் அருகே மூன்று கன்டைனர்களில் 570 கோடி ரூபாய்  கொண்டு செல்லப்படும்போது தேர்தல் ஆணையத்தின் பறக்கும் படை பறிமுதல் செய்தது.

வியாபாரிகளிடம் ஒரு லட்சம் இரண்டு லட்சம்  பணத்தையெல்லாம் கைப்பற்றி விபரம் சொல்லும் தேர்தல் ஆணையம் இந்த பணத்திற்கு விளக்கம் சொல்ல முடியவில்லை.

18  மணி நேரம்  கழிந்த பிறகு ஸ்டேட் பாங்கின் அதிகாரிகள் இந்தப் பணம் கோவையிலிருந்து விசாகப் பட்டணத்துக்கு கொண்டு செல்லப்பட்ட பணம் என்று தெரிவிக் கிறார்கள் .     கலைஞர் பல கேள்விகளை எழுப்பி இந்தப் பணம் யாருக்கு சொந்தமானது என்று கேள்வி எழுப்பியிருக்கிறார்.

அதன் பொருள் இந்தப் பணம் ஜெயலலிதாவுக்கு சொந்தமானதாக இருக்கலாமோ என்று சந்தேகம் எழுப்பப் படுகிறது.

மத்திய அமைச்சர் ஒருவரின் தலையீட்டின் பேரில்தான்  பணம் வங்கிக்கு சொந்தமானது என்று கோரிக்கை வந்தது என்றால் பிரச்சினை மிகப் பெரியது.

நிறுத்தாமல் சென்றது, ரிசர்வ் வங்கி விதிமுறைகள் பின்பற்றப் பட்டதா என்ற கேள்விகளுக்கு பதில் இல்லாதது, மிக மிக தாமதமாக வங்கி அதிகாரிகள் உரிமை கோரியது, இரவில் பயணித்தது, ஆவணங்களின் உண்மை நகல்கள் இல்லாமல் இருந்தது எல்லாவற்றிற்கும் மேலாக ஆவணங்களை காட்டி எங்கு  கொண்டு  செல்ல வேண்டுமோ அங்கு கொண்டு செல்லாமல் மீண்டும் கோவைக்கே கொண்டு செல்ல வருமான வரி துறை அதிகாரிகள் கடிதம் கொடுப்பது , என்று பல சந்தேக மேகங்கள் சூழ்ந்த மர்மக் கதை போல கதை நீளுகிறது.

தமிழக தேர்தலில் பயன்படுத்தப் படாமல் பாதுகாப்பாய் இருப்பில் வைக்க கொண்டு செல்லப் பட்ட பணம் என்றே பலரும் நம்புகிறார்கள்.

உண்மையாகவே  வங்கிப் பணம் என்றால் ஆவணங்களை காட்டி விசாகப் பட்டணம் போக வேண்டியதுதானே???     பணம் மீண்டும் கோவைக்கே திரும்ப பார்க்கிறது என்றால் விசாரணையை தவிர்க்கத்  தானே ?

முத்தாய்ப்பாக உச்ச நீதி  மன்றம் தலையிட்டு உயர்நீதிமன்றத்திடம் போங்கள் என்று உத்தரவிட்டிருக்கிறது.

உயர்நீதிமன்றமும் கைகழுவி விடாமல் உண்மையை கண்டுபிடிக்க உதவுமா ??!!!