பொதுமேடை

பாகிஸ்தான்,  வங்காளதேசம் , ஆப்கானிஸ்தான் போன்ற  நாடுகளில் இருந்து இந்தியாவில் அகதிகளாக தங்கியிருக்கும் இந்து சீக்கிய அகதிகளின் எண்ணிக்கை சுமார் இரண்டு லட்சத்திற்கும் மேல்.

நீண்ட கால விசா என்ற அடிப்படையில் தங்கியிருக்கும் இவர்களுக்கு வங்கிக்கணக்குகள் துவங்கவும் வருமான வரி அட்டை ,ஆதார் அட்டை பெறவும் சிறப்பு சலுகைகளை அளிக்க மோடி  அரசு திட்டமிட்டு இருக்கிறது.

குடியுரிமை  பெற ரூபாய் 15000 லிருந்து ரூபாய்  100  ஆக   கட்டணத்தை குறைக்கும் திட்டமும் இருக்கிறது.    ஏறத்தாழ 400 குடியிருப்புகள் வரை பல மாநிலங்களில் இருக்கின்றன.

வீடுகள் வாங்க, சுய தொழில் தொடங்க  வேலையில் அமர என்று பல திட்டங்களை மோடி அரசு திட்டமிட்டு வருவதாக செய்திகள் தெரிவிக்கின்றன.

தமிழகம் மற்றும் பல மாநிலங்களில் சுமார் இரண்டு லட்சம் இலங்கை அகதிகள் வாழ்ந்து வருகிறார்கள்.       சுமார்  30  ஆண்டுகளுக்கு மேலாக குடியுரிமை இல்லாமல் ‘ ஈழ ஏதிலியர் மறுவாழ்வு மையம் ‘ என்ற பெயரில் பல கொடுமைகளுக்கு ஆளாகி வாழ்ந்து வருகிறார்கள்.

சமீபத்தில் புதிய தலைமுறை தொலைக்காட்சி ஈழ அகதிகளின் சீரழிந்த வாழ்க்கையை படம் பிடித்து காட்டியபோது கலங்காதவர்கள் இருக்க முடியாது.

சிங்களனின் கைகளில் சிக்கி மாண்டது போதாது என்று தமிழனின் கைகளிலும் சிக்கி மாயவேண்டுமா என்று அவர்கள் கதறுவதை பார்க்க சகிக்க வில்லை.

ஈவிரக்க மில்லாத ஒரு தமிழ் அதிகாரியின் கொடுமையால் மின் கம்பத்தை தொட்டு தற்கொலை செய்த அகதியின் குரல் எதிரொலித்துக் கொண்டே இருக்கும்.

என்ன செய்வது.?   இந்திய அரசின் கைகளில் அதிகாரம் குவிந்து கிடக்கிறது.    மாநில அரசு தன் அதிகாரத்துக்கு உட்பட்டு செய்ய வேண்டிய சலுகைகளை தந்தால் என்ன கெட்டு விடும்?

ஐக்கிய நாடுகளின் அகதிகள் மறுவாழ்வு திட்டத்தில் இந்தியா சேராதது ஏன் ?

ஐரோப்பிய நாடுகள் அகதிகளை அரவணைத்துக் கொள்ளும்போது அடிமைப்பட்டு கிடந்த இந்தியா அதை மறுப்பதேன் ?

அகதிகளில் இந்துக்கள் என்றும் தமிழர்கள் என்றும் இந்திய அரசு பேதம் காட்டாது என்று நம்புவோம்?????!!!!

ஏறு தழுவுதல் என்ற ஜல்லிக்கட்டை நடத்த அனுமதிக்க மாட்டோம் என்று புறப்பட்ட மிருக வதை எதிர்ப்பாளர்களின் உண்மையான நோக்கம் தமிழர்களின் கலாச்சாரத்தை ஒழிப்பதுதான் என்று எல்லாருக்கும் இப்போது புரிந்து விட்டது.

குதிரைப்பந்தயங்கள் தடுக்கப்  படவில்லை.   ஒட்டக பந்தயங்கள் தடுக்கப்படவில்லை. நாய்க்கண்காட்சிகள் தொடர்கின்றன.

கேரளத்தில் திருச்சூர் பூரம்  திருவிழாவில் கட்சி மத வேறுபாடில்லாமல் திருவிழாவை நடத்தும் பொறுப்பை இரண்டு தனியார் தேவஸ்தான அமைப்புகள்- பரமேக்காவு ,திருவாம்பாடி – பாரம்பரிய முறைப்படி நடத்த வேண்டும் எல்லாரும் வேண்டுகோள் வைத்திருக்கிறா ர்கள்.

36  மணி நேரம் நடக்கும் இந்த  திருவிழாவில் 79  அலங்கரிக்கப் பட்ட யானைகள் அணிவகுக்கப்பட்டு காதைப் பிளக்கும் செண்டை மேளங்களுடன் பிரமாண்டமான வாணவேடிக்கைகளுடன்  நிறைவுபெறும் .

இந்த திருவிழாவில் யானைகள் துன்புறுத்தப் படுகின்றன என்ற குற்றச்சாட்டை தொடர்ந்து அதை ஆய்வு செய்ய இந்திய விலங்குகள் நல வாரியத்தின் அதிகாரிகள் அறுவர் கேரள அரசின் அதிகாரிகளால் தடுக்கப் பட்டிருக்கிறார்கள்.       மாநில விலங்குகள் துறை , வன இலாகா மாவட்ட ஆட்சியர்  காவல் அதிகாரிகள் அனைவரும் தடுத்திருக்கிறார்கள்.

எல்லா யானைகளின் கால்களிலும் இரும்பு சங்கிலிகள் பிணைக்கப் பட்டிருக்கும்.    அதுவும் முன் இரண்டு கால்கள் பின் இரண்டு கால்கள் எல்லாவற்றிலும் சங்கிலிகளால் பிணைக்கப்  படும்போது அந்த யானைகள் படும் துயரத்தை அனுமானிக்கவே முடியாது.

எது எப்படியிருந்தாலும் அதிகாரிகள் ஆய்வு செய்வதை மறுப்பதை எப்படி எடுத்துக் கொள்வது?    தவறு நடப்பதை மறைக்கத்தானே ?

இன்னமும் தனியார் ஆதிக்கம் கோவில்களில் கொலோச்சுவதை தமிழகம்  தவிர இந்தியாவின் எல்லா மாநிலங்களிலும் பார்க்க முடியும்.

கேரள அதிகாரிகளின் நடத்தை உச்ச நீதிமன்றம் அளித்த தாக்கீதுகளுக்கும் எதிரானது.

பார்ப்பன அதிகாரம் உச்ச நீதிமன்றத்திற்கும் மேலானது என்பதை சொல்லாமல் சொல்லி

இருக்கிறார்கள். 

இந்தியாவில் எல்லா மாநிலங்களிலும் ஒரே மாதிரியான கல்விக் கொள்கை இல்லை.

2009  ல் மருத்துவக் கவுன்சில் திட்டமிட்ட மருத்துவம்,பொறியியல் , கால்நடை மருத்துவம் போன்ற படிப்புகளுக்கு நுழைவுத்தேர்வு என்ற திட்டம் செல்லாதது என்று  2013 ல் அப்போதைய தலைமை நீதிபதி அல்டமாஸ் கபீர தீர்ப்பளித்தார் .   அவருடன் இருந்த தவே என்ற நீதிபதி தேர்வுக்கு ஆதரவாகவும் விக்ரம்சித் சென் என்பவர் எதிராகவும் தீர்ப்பளித்ததால்  கபீர் தீர்ப்பு நிலைத்தது. அதுவும் தான் ஓய்வு பெறும் நாளுக்கு ஒரு நாள் முன்பு இந்த தீர்ப்பை அளித்தார்.

அதே தவே  என்ற  நீதிபதி மற்றும் நால்வர் கொண்ட அரசியல் சாசன பெஞ்ச் இப்போது  தேசிய தகுதி மற்றும் நுழைவுத் தேர்வு நடத்தலாம் என்று தீர்ப்பு சொல்லியிருக்கிறது. .

தமிழ்நாட்டில் ஆனந்தகிருஷ்ணன் தலைமையில் அறுவர் கொண்ட குழு அமைத்து அவர்களின் பரிந்துரையின் பேரில்தான் 06.12.2006  ல் தமிழக சட்ட மன்றத்தில் மசோதா நிறைவேற்றப்பட்டது.

கிராமப் புற மாணவர்களின் வாய்ப்புகளை பறிக்கும் நோக்கில் இந்த தேர்வு செயல்படும் என்பதில் சந்தேகமேயில்லை.

உயர்சாதி ஆதிக்கம்  உயர் கல்விகளில் நீடிக்க வகை  செய்யும் பலவித தந்திரங்களில் இதுவும் ஒன்றாகத்தான் பார்க்கப்படும்.

ஒரே கல்வி முறை இல்லாத போது ஒரே தேர்வு முறை மட்டும் எப்படி நியாயமாக நடக்க முடியும்.

தமிழ் நாட்டை எப்படி இந்த தீர்ப்பு கட்டுப் படுத்தும் என்பதும் கேள்விக்குறி.

மொத்தத்தில்   குழப்பங்களை  தீர்த்து வைக்க வேண்டிய உச்ச நீதி மன்றம் இந்த தீர்ப்பின் மூலம் பல குழப்பங்களை உருவாக்கி  இருக்கிறது.

சட்டிஸ்கர் மாநிலம் சுர்கூஜா மாவட்டத்தில் ஒரு பழங்குடி இன  விவசாயி  நான்கு ஏக்கர் நிலத்தில் வெங்காயம்,   தானியம்,   எண்ணெய்வித்துக்கள்  சாகுபடி செய்திருந்தார்.

ஒருநாள் பருவம் தவறி பெய்த மழையாலும் சூறாவளிக்காற்று வீசியதாலும்  அனைத்து பயிர்களும் நாசமாகிவிட்டன.      வங்கிகளில் ரூபாய் ஒன்னேகால் லட்சம் கடன் வாங்கியிருந்தார் அந்த விவசாயி.   அரசு அதிகாரிகள் கிராமத்தில் முகாமிட்டு பாதிக்கப் பட்ட இடத்தை பார்க்காமலேயே அறிக்கை தயார் செய்து அரசுக்கு அனுப்பினர்.

கொஞ்ச நாள் கழித்து விவசாயிக்கு கிடைத்தது ரூபாய்   81 க்கான  காசோலை. இதேபோல் அந்த ஊரில் பலருக்கும் ரூபாய் நூறிலிருந்து ஆயிரம் வரை நிவாரணம் கிடைத்துள்ளது.

கேட்டால் எல்லாம் விதிமுறைகளின்படியே கணக்கிடப்பட்டது .   நாங்கள் வேறு ஒன்றும் செய்ய முடியாது என்று தாசில்தார் குழு சாதிக்கிறது.

கோவை வேப்பம்பள்ளம புதூர்  கிராமத்தில் ஒரு விவசாயி தனது ஆறு ஏக்கர் நிலத்தை அடமானம் வைத்து  ரூபாய் 70 லட்சம்  வங்கிக்கடன் வாங்கி தனது நிலத்தில் பசுமை வீடு கட்டுகிறார்.    அதற்கு 50 % மானியம் எதிர்பார்த்திருக்கிறார் அந்த விவசாயி.    மாநியம் கிடைக்காதது மட்டுமல்ல வங்கி அதிகாரிகள் வீட்டுக்கு வந்து மிரட்டியும் சென்றிருக்கிறார்கள்.  ராமசாமி என்ற அந்த விவசாயி  அன்றே பூச்சி   மருந்தை குடித்து தற்கொலை செய்து கொண்டிருக்கிறார்.    கடன் தந்த மன அழுத்தம் உயிரை குடித்து விட்டது.

மோடி அரசு அறிவித்த காப்பீடு திட்டம் எப்போது அமுலுக்கு வருவது எப்போது விவசாயி

நிம்மதியாக வாழ்வது.???!!!!