பொதுமேடை

ஐந்து நட்சத்ர ஓட்டல்களை தவிர மற்ற இடங்களில் பிராந்தி விஸ்கி விற்பதை தடை செய்து கேரள அரசு போட்ட உத்தரவு சரியே என்று உச்ச நீதி மன்றம் தீர்ப்பு அளித்துள்ளது.
அரசின் கடமை குடியின் தாக்கத்தை குறைப்பது என்பதை தீர்ப்பு வலியுறுத்துகிறது. அரசியல் சட்ட பிரிவு 47 ன் படி அரசின் கடமை மதுவிலக்கை அமுல்படுத்துவது.

நாட்டின் பல பகுதிகளில் மதுவிலக்கை அமுல்படுத்துவதில் உள்ள சிரமங்களை குறிப்பிட்ட நீதிமன்றம் இருந்தாலும் அரசின் கடமை மது வின் பயன்பாட்டை குறைக்க நடவடிக்கை எடுப்பது என்பதை சுட்டிகாட்டியிருக்கிறது.

கள் , சாராயம் கிடைக்கும். பீர் வைன் கிடைக்கும். ஆனால் பார் கிடையாது. கடையில் வாங்கி வீட்டில் குடித்துக் கொள்ளுங்கள். இந்த ரீதியில் கட்டுப் பாடுகளை விதித்து கேரள அரசு கொள்கை வகுத்து செயல்படுகிறது. இதன் மூலம் நூறு சதம் கல்வி அறிவுள்ள மக்கள் நாட்டின் பதினான்கு சத வீத குடிகாரர்களாக இருப்பதை மாற்ற அரசு திட்டமிடுகிறது.

உச்சநீதி மன்ற தீர்ப்பு பீகாரில் நிதிஷ் குமார் ஆட்சிக்கும் ஒருவகையில் வழிகாட்டியாக இருக்கும். ஏப்ரல் மாதம் தொடங்கி அங்கும் மது விற்பனையில் பல கட்டுபாடுகளை விதிக்க அந்த அரசு திட்டமிட்டிருக்கிறது.

அந்தோ? தமிழகத்தில் ஏதாவது நடக்குமா என்ற ஏக்கம் பிறக்கிறதா இல்லையா?
ஜெயலலிதா அரசு செய்துகொண்டிருக்கும் மிகப் பெரிய அநியாயம் டாஸ்மாக் கடைகளுக்கு இலக்கு வைத்து வியாபாரத்தை விருத்தி செய்வதுதான்.
உச்ச நீதி மன்ற தீர்ப்பு ஜெயலலிதாவின் கண்ணைத் திறக்குமா?

நேற்று சென்னையில் நடந்த ரத்த தான முகாம் முடிந்த பிறகு பத்திரிகையாளர்களை விஜயகாந்த் சந்தித்தார்.

2016 தேர்தலில் ஜெயலலிதா ஜெயிப்பாரா என்று ஒரு நிருபர் கேட்டார். ‘ ஜெயலலிதா ஜெயிக்கமாட்டார் என்று பதில் சொல்லிய விஜயகாந்த் பத்திரிகையாளர்களைப் பார்த்து இதே கேள்வியை ஜெயலலிதாவை பார்த்து கேட்கும் துணிச்சல் உங்களுக்கு உண்டா என்று கேட்டுவிட்டு ‘ தூ’ என்று காரித் துப்பினார்.

அதிர்ச்சியடைந்த பத்திரிகையாளர்கள் கேள்விகளை முடித்துக் கொண்டு கிளம்பி விட்டார்கள். ஆனால் அதற்குப் பிறகு விழித்துக் கொண்ட அல்லது தூண்டி விடப்பட்ட பத்திரிகையாளர் சங்கங்கள் ஆங்காங்கே விஜயகாந்துக்கு எதிராக அறிக்கைகளை விட துவங்கி விட்டார்கள். மன்னிப்பு கேட்க வேண்டும் என்ற குரல் ஓங்கி ஒலிக்கத் துவங்கி விட்டது.
விஜயகாந்த் நடந்து கொண்டது தவறு என்பதில் எந்த சந்தேகமும் இல்லை. அநாகரிகமானது மட்டுமல்லாமல் அடுத்த தேர்தலில் எல்லாரும் போட்டி போட்டுக் கொண்டு இவரை தேடி வருகையில் இவர் அதற்கு தகுதியானவர் தானா என்ற கேள்வியை இவரே எழுப்பி விட்டார்.

ஏற்கனெவே கட்சிக்கு கொள்கையும் இல்லை திட்டமும் இல்லை இது ஒரு குடும்பக் கட்சி என்று புகார் உள்ளது. அதனால்தான் இவர் குடும்பத்தை தாண்டி வேறு யாரும் கட்சியில் முக்கிய பொறுப்பில் இல்லை. எந்த பிரச்சினை குறித்தும் இவர் கட்சி சார்பில் யாரும் பேசுவதில்லை. என்ன பேசுவது என்பதில் பிரச்சினையா யார் பேசுவது என்பதில் பிரச்சினையா ? எப்படி இருந்தாலும் ஒரு அரசியல் கட்சிக்கு உரிய எந்த அம்சங்களும் இல்லாமல் ஒரு கட்சி பல ஆண்டுகளாக லாபத்தொடு நடந்து வருகிறது என்றால் அது விஜயகாந்த் கட்சியாகத்தான் இருக்கும். . இருந்தாலும் கலைஞருக்கும் ஜெயாவுக்கும் மாற்றாக ஒரு சக்தி தேவைப்பட்டபோது இவர் தெரிந்ததால் செல்வாக்கு கூடி நிற்கிறது.

தகுதியில்லாதவர்களுக்கு பதவி வந்தால் இப்படித்தான் என்றும் இவரோடு கூட்டு சேர்ந்து தவறு இழைத்து விட்டேன் என்றும் ஜெயலலிதா புலம்பினார். பல சமயங்களில் பொது இடங்களில் பலரை அடித்து கெட்ட பெயரை சம்பாதித்துக் கொண்டார்.

இவ்வளவு இருந்தாலும் அவர் கேட்ட கேள்வியில் பொருள் இல்லாமல் இல்லை. ஜெயலலிதா ஆட்சியில் இத்தனை அநியாயம் நடக்கிறதே கொள்ளை நடக்கிறதே, எத்தனை பத்திரிகையாளர்கள் நியாயமாக கேள்வி கேட்டிருக்கிரர்கள்?.. விமர்சித்து எழுதி இருக்கிறர்கள்?

. பாராளுமன்றத் தேர்தலில் பண பலத்தோடு தான் வெற்றி பெற்றார் என்பது உலகம் அறிந்த உண்மை. எத்தனை பேர் பதிவு செய்தார்கள். ? தி மு க ஆட்சியில் நடக்க வில்லையா என்பதே பதிலாய் போனது. அதற்குத்தான் தண்டனை கொடுத்து வீட்டில் உட்கார வைத்தாகிவிட்டதே என்று யாரும் பதில் கேள்வி கேட்கவில்லை.
விலை போன பத்திரிகையாளர்களுக்கு எப்படி இத்தனை கோபம வரலாம்?

தகுதி இல்லாத தலைவர்களும் விலை போன பத்திரிகையாளர்களும் சேர்ந்து கொண்டு தமிழ் நாட்டை கூறு போட்டு விற்றுக்கொண்டிருக்கிறார்கள்.

வி பி சிங் தனது ஆட்சிக் காலத்தில் மண்டல் கமிஷன் பரிந்துரைகேற்ப மத்திய அரசு வேலைகளில் பிற்பட்டோருக்கு 27% ஒதுக்கீடு செய்ய ஆணையிட்டார்.
அதை நேரடியாக எதிர்க்காத பா ஜ க மறைமுகமாக ராமர் கோயில் பிரச்சினையை கிளப்பி வி பி சிங் அரசு தொடர முடியாத அளவுக்கு சதி செய்து ஆட்சியை மாற்றியது.

இருபது ஆண்டுகளுக்கு மேலாகியும் இன்னும் மண்டல் கமிஷன் பரிந்துரைகள் குப்பைத்தொட்டியில் போடப்பட்டு வருகிறது என்பதை அண்மையில் டைம்ஸ் ஆப் இந்தியா நாளேடு வெளிக்கொண்டுவந்திருகிறது.

1.1.2015 அன்று நிலவரப்படி ஏ பி சி டி வகை மத்திய அரசு பணியாளர்கள் 79,483 பேரில் 9040 பேர் மட்டுமே பிற்பட்டோர் என்ற அதிர்ச்சித் தகவல் தகவல் உரிமைச் சட்டம் வாயிலாக கிடைக்கப் பெற்றிருப்பதாகவும் அந்த செய்தி கூறுகிறது..
இந்த தகவலை அளித்த துறையும் நியமனங்களை செய்யும் துறையுமான மனித வள மேம்பாட்டுதுறையிலேயே தங்கள் விகிதாசாரத்திற்கு மாறாக தாழ்த்தப்பட்டோர் 12.91 % மும் மலைவாழ் மக்கள் 4% மும் மிகவும் பிற்பட்டோர் 6.67 % மும் மட்டுமே பணியில் இருக்கிறார்கள்.

குடியரசுத்தலைவர் அலுவலகத்தில் ஏ கிரேடு அதிகாரிகளில் யாருமே பிற்பட்டோர் இல்லை.
இன்னும் கொடுமை என்னவென்றால் இந்த தகவல்களை கேட்டால் நாற்பதிற்கும் மேற்பட்ட அமைச்சகங்கள் தகவல்களை தருவதில்லை.
எனவேதான் அரசுப் பணிகளில் இட ஒதுக்கீடு அமுல் படுத்தப் படுவதை கண்காணிகக ஒரு தனி அமைப்பு வேண்டும் என்பதை வலியுறுத்தி கருணாநிதி ஒரு அறிக்கை வெளியிட்டிருக்கிறார்.

விழிப்புணர்வு பெறவேண்டிய இட ஒதுக்கீட்டுப் பிரிவினர் தூங்கிக் கொண்டிருப்பதால் தான் இது சாத்தியமாகிறது.
மத்தியில் புள்ளியியல் துறை என்று ஒன்று இருக்கிறதே அவர்கள் என்னதான் செய்கிறார்கள்??!!!

உயர் நீதி மன்ற நீதிபதி வைத்தியநாதன் கோவிலுக்கு வருபவர்களுக்கு கண்ணியமாக உடை உடுத்தும் படி நிபந்தனை விதிக்க அறநிலையத் துறைக்கு அறிவுறுத்தி இருந்தார்.
அதை பின்பற்றி இந்து சமய அறநிலையத் துறை அனுப்பி இருக்கும் சுற்றறிக்கையில் ஜனவரி ஒன்றாம் தேதி முதல் கோவில்களில் ஜீன்ஸ், லெகின்ஸ்,குட்டைப்பாவாடை , மிடி போன்றவற்றை அணிந்து வரக்கூடாது என்று கூறியிருக்கிறது.

இது எந்த வகையில் செல்லுபடியாகும் என்று தெரியவில்லை.
பொதுவாக கேரளா கோவில்களில் ஆண்கள் மேலாடை அணிவதில்லை. கன்னியாகுமரி கோவில்களில் பேன்ட் அணிவது கூட அனுமதிக்கப் படுவதில்லை.
இந்த சம்பிரதாயங்களில் ஏதேனும் பொருள் இருக்கிறதா என்று எந்த பக்தனும் கேள்வி கேட்பதில்லை.

மேலே பா ஜ க இங்கே அ தி மு க இடையே இருக்கும் பிரச்சினைகளுக்கு எல்லாம் தீர்வு என்பது அடுத்த ஆண் டு வரும் பொதுத் தேர்தலில் தெரியும் என்றாலும் அதற்குள் பக்தர்களை சோதனைக்கு உட்படுத்த வேண்டாம் என்பதே இப்போதைய மக்களின் எதிர்பார்ப்பு. ???!!