பொதுமேடை

அணுமின்நிலையங்கள் இந்தியாவில் ஏழு இடங்களில் 22 அணு உலைகளுடன் இயங்கி வருகின்றன.

குஜராத்தில் கக்ராபூர், மகாராஷ்டிராவில் தாராபூர், கர்நாடகாவில் கைகாவில், ராஜஸ்தான், உத்தர பிரதேசம் நரோடாவில் மற்றும் தமிழ்நாட்டில் கல்பாக்கம், கூடம்குளம் ஆகியவைதான் ஏழு அணுமின்நிலையங்கள்.

அணுமின்நிலையங்களில் விபத்து ஏற்பட்டால் ஏற்படும் இழப்பை யார் ஈடு கட்டுவது என்பது பற்றி இதுவரை வரையறை செய்யப்படவில்லை.

அணுஉலைகள் தொடர்பாக தொடுக்கப்பட்ட வழக்கில் உச்ச நீதிமன்றம் 15 நிபந்தனைகளுக்கு உட்பட்டு அணு உலைகள் இயங்க அனுமதி அளித்தது. அந்த நிபந்தனைகளில் முக்கியமானது அணுக்கழிவுகளை அணு உலைக்கு வெளியே வைப்பதற்கான வசதியை ஐந்து ஆண்டுகளுக்குள் உருவாக்க வேண்டும் என்பது. 

அது இன்னும் முடிவடையாததால் மீண்டும் விசாரணைக்கு வந்தபோது தேசிய அணு மின் கழகம் அவகாசம் கேட்டதால் 2022க்குள் அணுக்கழிவுகளை அணு உலைக்கு வெளியே கட்டி முடிக்க அவகாசம் அளித்தனர்.

எனவே இப்போது அணுமின் கழகம் 22 அணு உலைகளிலும் கிடைக்கும் அணுக்கழிவுகளை கூடம்குளத்தில் சேமிக்க திட்டமிட்டு அதற்கான கருத்துக் கேட்புக் கூட்டம் ஜூலை 10 ம் தேதி நடத்த இருக்கிறது.

அது உண்மையில் நடக்குமா அல்லது சம்பிரதாயத்திற்காக நடத்தி கூடம்குளத்திலேயே அமைக்க திட்டமிடுவார்களா என்பது தெரியவில்லை.

அணுக்கழிவுகளில் ஆபத்து அதிகம். அதன் வீச்சை பாதிப்பில் இருந்து காக்க 24000 ஆண்டுகள் பாதுகாப்புடன் வைக்க வேண்டுமாம்.

அமெரிக்காவில் யுக்கா மலையில் இந்த அணுக்கழிவு மையம் அமைக்க கொடுத்த அனுமதியை ஒபாமா திரும்ப பெற்றுக் கொண்ட பிறகு அதன் ஆபத்து பற்றி அச்சம் அதிகமாகி இன்னும் எப்படி பாதுகாப்பாக சேமிப்பது என்பது பற்றிய நடைமுறை இன்னும் இறுதி செய்யப்படவில்லை. அமெரிக்காவில் Nuclear Waste Management Act  என்று தனிச்சட்டமே வைத்திருக்கிறார்கள். இந்தியாவில் Atomic Energy Act 1962  இருக்கிறதே தவிர கழிவுகளுக்கு என தனி சட்டம் இல்லை.

உச்சநீதிமன்றம் கழிவு பாதுகாப்பு பற்றி மையம் அமைத்த பிறகுதான் உலைகளை இயக்க வேண்டும் என்று சொல்லியிருந்தால் உலைகள் செயல்பட்டிருக்கவே  முடியாது.

இன்று இந்தியாவின் மொத்த மின்சார தேவையில் வெறும் 3.2% தான் அணுமின்சாரத்தால் கிடைக்கிறது. எனவே அணுமின்சாரம் ஒன்றும் தவிர்க்க முடியாதது அல்ல.

எப்படி இருந்தாலும் அணுக்கழிவு மையம் தமிழகத்தில் அமைய தமிழ்நாடு அரசு அனுமதிக்கக் கூடாது.

அதற்கு மாநில அரசு சுயமாக இயங்கும் அரசாக இருக்க வேண்டும். இப்போது இருக்கும் பாஜகவின் ஊதுகுழலாக இயங்கும் அதிமுக அரசுக்கு அந்த தைரியம் இருக்குமா?

மராட்டிய மாநில பெண் ஐஏஎஸ் அதிகாரி நிதி சவுத்திரி.

பாஜகவின் தலைவர்களும் இந்து மகா சபை தலைவர்களும் மகாத்மா காந்தியை இழிவுபடுத்தியது போதாது என்று இவரும் தனது த்விட்டார் பக்கத்தில் பதிவிட்டிருந்தார்.

‘மகாத்மா காந்தியின் 150 வது பிறந்த நாள் கொண்டாடப் படவுள்ளது. அவரது படத்தை ரூபாய் நோட்டில் இருந்து அகற்றுவதற்கு இதுதான் சரியான நேரம். அவரது சிலைகள் உலகம் முழுவதும் இருந்து அகற்றப் பட வேண்டும். அவரது பெயர் சூட்டப்பட்ட நிறுவனங்கள் சாலைகளுக்கு மறுபெயர் சூட்ட வேண்டும். இதுதான் நாம் அனைவரும் செய்யவேண்டிய முக்கிய கடமையாகும். 30.01.1948ல் கோட்சே செய்த செயலுக்காக (மகாத்மா காந்தி கொலை) அவருக்கு நன்றி தெரிவித்துக் கொள்கிறேன்.’

இதைவிட கொடுமையாக ஒருவர் எழுத முடியுமா? அவர் எவ்வளவு அழுகிய மனம் கொண்டவராக இருந்தால் இப்படி எழுதியிருப்பார்.?

மாநில காங்கிரஸ் தலைவர் அசோக் சவான் தேசியவாத காங்கிரஸ் தலைவர் ஜிதேந்திரா அவுகத் போன்றவர்கள் அவரை பதவி நீக்கம் செய்ய வற்புறுத்தி  இருந்தனர்.

மாநிலத்தில் ஆளுவது பாஜக கூட்டணி ஆட்சி. எப்படி நடவடிக்கை எடுப்பார்கள்.  அதிகபட்ச நடவடிக்கை இட மாற்றம். அதைத்தான் செய்தார்கள்.

கண்டனம் அதிகமானவுடன் தனது பதிவை நீக்கியவர் சொன்னது அதைவிட மோசம். நான் எனது மனதில் பட்ட கருத்தை தான் கூறியிருந்தேன். அது தவறாக உணரப்பட்டுள்ளது. நான் மகாத்மா காந்தி குறித்து அவதூறாக எதுவும் சொல்ல வில்லை என்று கூறியிருக்கிறார்.

பாஜக ஆட்சியில் காந்தி மீதான தாக்குதல் இன்னும் அதிகரிக்கும் என்றுதான்  தோன்றுகிறது.

சாத்வி பிரக்யா சிங்கின் கோட்சே தேசபக்தர் என்ற பேச்சைதான் மன்னிக்கப் போவதில்லை என்று பிரதமர் மோடி கூறியதெல்லாம் சும்மா.