பொதுமேடை

வாவர் மசூதிக்கு பெண்கள் வரலாம்

சபரிமலைக்கு அனைத்து வயது பெண்களும் வரலாம் என்ற உச்ச நீதிமன்ற தீர்ப்புக்கு உருவம் கொடுக்க முயலும் பெண்கள் காவல் துறையால்  தடுத்து திருப்பி அனுப்பப் படுகிறார்கள்.

அதையும் மீறி இதுவரை நான்கு பெண்கள் அய்யப்ப தரிசனம் செய்து இருக்கிறார்கள்.

இடையில் பெண்கள் தரிசனத்துக்கு எதிராக போராட்டம் நடத்தும் இந்து அமைப்புகள் பெண்களை வாவர் மசூதிக்கு அழைத்து சென்று அதன் மூலம் பிரச்னையை கிளப்பி இந்து கோவிலுக்குள் பெண்களை அனுப்பும் நீதிமன்றம் மசூதிக்குள் அனுப்புமா என்ற கேள்வியை எழுப்ப திட்டமிட்டு அதற்காக பெண்களை திரட்டி வாவர் மசூதிக்கு அனுப்பி வந்தனர். காவல் துறையும் சிலரை திருப்பி அனுப்பி வந்தனர். அவர்கள் மீது மதக்கலவரம் ஏற்படுத்தும் முயற்சி உட்பட பல பிரிவுகளில் வழக்கு பதிவு செய்தது.

பிரச்னை வேறு திசையை நோக்கி பணிப்பதை அறிந்த மசூதி நிர்வாகிகள் பிரச்னையை தெளிவுபடுத்த தீர்மானித்து ஒரு அறிக்கை வெளியிட்டார்கள்.

அதில்’ வாவர் மசூதியில் பல ஆண்டுகளாக பின்பற்ற பட்டு வரும் ஆச்சாரங்களில் எந்த மாற்றமும் ஏற்படுத்தப்படவில்லை. வாவர் மசூதிக்கு வயது வித்தியாசம் இன்றி ஆண்களும் பெண்களும் வருகிறார்கள். இங்கு வரும் பெண்கள் உட்பட பக்தர்கள் பிரார்த்தனை செய்து காணிக்கை செலுத்தி விட்டு  சபரிமலைக்கு  செல்கிறார்கள். பள்ளி வாசலுக்குள் தொழுகை நடத்தும் இடத்திற்கு பெண்கள் செல்வது கிடையாது. நல்ல எண்ணத்துடன் இங்கு வர யாருக்கும் தடையில்லை. ‘ என்று தெளிவு படுத்தியிருந்தார்கள் .

அதனால் இந்து முஸ்லிம் பிரச்னை ஏற்படுத்த முயன்ற இந்து அமைப்பினர் ஏமாற்றத்திற்கு உள்ளாகி இருக்கிறார்கள்.

இடையில் காவல்துறையின் பாதுகாப்போடு தரிசனம் செய்த பிந்து, கனகதுர்கா மற்றும் இலங்கை சசிகலா தவிர தற்போது மஞ்சு என்ற பெண் தான் காவல்துறை பாதுகாப்பு இல்லாமல் பக்தர்களோடு பக்தராக கலந்து பதினெட்டாம் படி ஏறி இருமுடி கட்டி நெய்யபிஷேகம் உட்பட சடங்குகளை செய்து சுவாமி  தரிசனம் செய்திருக்கிறார்.

இதற்கும் பரிகாரம் செய்வார்களோ? நடையை சாத்திய தந்திரிகள் மீதான விசாரணை முடிந்து அவர்களுக்கு எச்சரிக்கையோ தண்டனையோ அளித்தால் பின்பு எந்த தடையும் இருக்காது.

பாஜக ஆட்சி இருப்பதால் தீர்ப்பை செல்லாதது ஆக்கி விட முடியும் என்று நம்புகிறார்கள்.

கம்யுனிஸ்டு ஆட்சியை அகற்றும் அளவுக்கு  கூட போக பாஜக தயாராக இருக்கிறது.   அதற்கு நீதிமன்றம் அனுமதிக்காது என்பது வேறு.

மதவாதம் தோற்பது உறுதி.!

தெருக்களை ஆக்கிரமித்து இருக்கும் வழிபாட்டுத்தலங்கள்

பொது இடங்களை ஆக்கிரமித்து எத்தனை வழிபாட்டு தலங்கள் உள்ளன என்று அறிக்கை தாக்கல் செய்ய அரசுக்கு உயர் நீதிமன்றம் உத்தரவு இட்டு இருக்கிறது.

அரசு அலுவலக வளாகங்களில் வழி பாட்டு தலங்கள் இருக்கக்கூடாது என்ற 1968-ம் ஆண்டின் தமிழக பொதுத்துறை ( சட்டம் மற்றும் ஒழுங்கு ) அரசாணை மற்றும் அதை வலியுறுத்தி 1994-ம் ஆண்டில் வெளியிடப்பட்ட சுற்றறிக்கை ஆகியவைகளை அமுல்படுத்த தாக்கல் செய்யப்பட்ட மனுவில் சென்னை உயர் நீதிமன்றம் மேற்கண்ட அறிக்கை கேட்டு உத்தரவிட்டிருக்கிறது.

இப்போது, நீதிமன்றம், மருத்துவமனை,  காவல் நிலையங்கள் அரசு அலுவலகங்கள் என்று எல்லா இடங்களிலும் நீக்கமற நிறைந்திருக்கும் தெய்வங்களும் சிலுவைகளும், பிறைகளும் அகற்றப் பட்டால்தான் இந்த நாடு மதம் சார்ந்தது அல்ல என்ற உணர்வு  தழைக்கும். மத போட்டி மறையும்.

தெரு ஆக்கிரமிப்பு கோவில்கள் லட்சக் கணக்கில் இருக்கும். கிறிஸ்தவர்கள் தெரு முனைகளில் ஆக்கிரமித்து மேரிமாதா, சிலுவை போன்றவற்றை வைத்து இருப்பார்கள். முஸ்லிம்கள் சில இடங்களில் நட்ட நடுத்தெருவில் தர்காக்களை வைத்திருக்கிறார்கள். நீதிமன்ற கருத்துப்படி எல்லா ஆக்கிரமிப்புகளும் அகற்றப்பட வேண்டும்.

இதில் இந்து, முஸ்லிம், கிறிஸ்தவர் என்ற பாகுபாடு கூடவே கூடாது. அவர்கள் அனைவரும் ஆக்கிரமிப்பாளர்கள் என்ற முறையிலேயே அணுகப்பட வேண்டும்.

அநேகமாக எல்லா ஆக்கிரமிப்புக் கோவில்களும் தனி நபர்களால் ஆக்கிரமிப்பு செய்யப் பட்டவையே. மத உணர்வுள்ளவர்களின் ஆதரவைப் பெற்று பின்னர் விரிவு படுத்திவிடுகிறார்கள்.

அதுவும் சென்னை போன்ற நகரங்களில் தான் தெரு ஆக்கிரமிப்பு கோவில்கள் அதிகம்.

மிகவும் சிறிதாக ஒரு சிலையை வைப்பார்கள். பின்னர் சில மாதங்களில் அது சிறிதாக விரிவு படுத்தப்படும். கோவில் கட்டுவதை ஒரு தொண்டாக இல்லாமல் ஒரு வணிகமாக பார்த்துத் தான் இவை தோன்றுகின்றன.

அதிலும் சில காலமாக சீரடி சாய்பாபா கோவில்கள் நடமாடும் வண்டிகளில் ஆரம்பித்து தெரு முனை கோவில் என்று பல ரூபங்களில் கிளை பரப்பிக்கொண்டிருக்கிறது. அதற்கு என்று முதலீடு போடுவதற்கு என்று சிலர் இருக்கிறார்கள்.

பக்தி வணிகம் பல ரூபங்களில் கிளை பரப்பிக் கொண்டிருக்கிறது.

இதிலே பலி ஆவது உண்மை பக்திதான்.

அதிலும் திடீர் திடீர் என்று கிராமப் புறத்து அய்யனார் கோவில்களுக்கு பக்கத்தில் ஆஞ்சநேயர் கோவில்கள் முளைக்கின்றன. இதெல்லாம் யார் வேலை என்றால் தமிழர் தெய்வங்களுக்கு பதில் சனாதன தெய்வங்களை பிரபலபடுத்தும் வேலையில் யாருக்கு அக்கறை இருக்கிறதோ அவர்களால் முடுக்கி விடப்படுகிறது.

பாமர இந்துக்களுக்கு தெருக்கொவில்கள் பெரிதும் ஆறுதல் என்பதும் உண்மைதான்.    அவர்களுக்கு பக்தியை வீட்டிலேயே கடைப்பிடிக்க கற்றுக்  கொடுக்க வேண்டும்.

உண்மையான் பக்தி மார்க்கம் பரவ தெருக்கோவில்கள், சிலுவைகள், பிறைகள் இடம் கொடுத்து ஒதுங்க வேண்டும் அல்லது அரசு ஒதுக்க வேண்டும்.

அதற்கு அரசு உத்தரவாதம் அளிக்க வேண்டும்.