பொதுமேடை

இன்று மேதகு வேலுப்பிள்ளை பிரபாகரனின்  64 வது பிறந்த நாள்.

கொண்டாட  வேண்டிய திருநாள். மீண்டும் வந்து பிறப்பாரா என்று ஏங்க வைக்கும் நாள்.

தியாகம் என்றால் என்ன என்பதை தன் வாழ்க்கையால் உணர்த்திய பெருமகன்.

வீரம் என்றால் என்ன உலகத்திற்கு உணர்த்திய மாவீரன்.

மறைந்தாலும் வாழும் மாவீரர்கள் தமிழ் மரபில் நடுகல் நடப்பட்டு வணங்கப் பட்டு வந்தார்களே அந்த மரபில் வணங்கப் பட வேண்டிய தமிழ்த் தாயின் தலைமகன் பிரபாகரன்.

இரண்டு சொட்டு கண்ணீர்- இரண்டு நிமிட தியானம்- இரண்டு நிமிட வழிபாடு – உளமார உறுதி பூண்டு அவர்  தம் கொள்கைகளில் சிலவற்றையாவது வெற்றி பெற செய்ய உழைப்பது – இதுவே நாம் செலுத்தும் உண்மையான அஞ்சலியாக இருக்கும்.

வலிமையுள்ளது பிழைத்துக்கொள்ளும் என்ற டார்வினின் தத்துவத்தில் நம்பிக்கை கொண்ட எதார்த்தவாதி .

உடன்படிக்கைகளை உடைத்து  எறிந்து ஏமாற்றுவதையே கலையாக பயின்று அடக்கு முறையை கொள்கையாக கொண்டவர்களிடம் நீதி கிடைக்காது என்ற முடிவுக்கு வந்தபின்னரே ஆயுத போராட்டம் மூலம் தம் மக்களுக்கு விடுதலை தேடித் தர முடியும் இலக்கோடு பணியாற்றினார்.

போரிலும் அறம் பிறழவில்லை.   உலகம் கண்டு வியந்தாலும் இறுதி கட்ட போரில் அமெரிக்காவோடு இந்தியா உள்ளிட்ட 21  நாடுகள் இனவாத இலங்கை அரசுக்கு ஆதரவாக நின்றது ஏன் என்ற கேள்விக்கு யாராலும் இப்போது விடை காண இயலாது.

புலிகளின் தாகம் தமிழ் ஈழ விடுதலை – என்ற கனவு அடக்கி வைக்கப் பட்ட இனத்தின் குமுறல். அது ஆயுத போராட்டத்தால் கிடைக்க வழி அடைக்கப் பட்டுள்ளது.

ஆனால் அறிவாயுதத்தின் வழி என்றும் அடைபடாது அடைக்கப்  பட முடியாது.

எந்த  இனமும் நிரந்தரமாக அடிமைப்படுத்தப் பட  முடியாது.

தீர்வு தள்ளிப் போயிருக்கிறது. வந்தே தீரும்.

மாவீரர் தின உரை கேட்க உலக தமிழர்கள் காத்திருந்த காலம் வீண் போகாது.

‘காங்கிரசும் அகில இந்திய முஸ்லிம் கட்சியும்தான் கூட்டணிக் கட்சிகள்; வைகோ, திருமாவளவன், போன்றவர்கள் நட்புக் கட்சிகள். ஏன் கம்யுநிச்டுக் கட்சிகள் கூட அப்படித்தான். ‘ என்ற திமுக பொருளாளர் துரைமுருகனின் பேட்டியால் திமுக வைகோவையும் திருமாவளவனையும் கழற்றி விடுகிறதா என்ற சர்ச்சை எழுந்துள்ளது.

அதே நேரத்தில்  அவர்களை நட்புக் கட்சிகள் என்றுதான் துரைமுருகனும் குறிப்பிட்டிருக்கிறார். இதில் தவறு ஏதும் இருப்பதாக தெரியவில்லை.. நட்புக் கட்சிகள் கூட்டணிக் கட்சிகளாக மாற என்ன தடை?

கடந்த காலத்தை கவனித்தால் தேர்தல் வரும்போது அதுவரை இருந்த கூட்டணி கட்சிகள் அணி மாறி வேறு வேறு கூட்டணிகளில் இடம் பெறுவது வாடிக்கை என்பது தெரியவரும்.

2006  சட்டமன்ற தேர்தல்களில் அதுவரை திமுகவுடன் கூட்டணியிலிருந்த வைகோ 25 இடங்களில் உறுதியாக இருந்தார் கலைஞர் 22 இடங்கள் மட்டுமே தர முன்வந்தார்.  வைகோ திமுக அணியை விட்டு விலகி 35 இடங்களை அதிமுகவிடம் பெற்றுக்கொண்டு அணி மாறினார் என்பது வரலாறு.

பல தேர்தல்களில் எதிர்த்து நிற்பது என்பது யாரை வெற்றி பெறச் செய்ய வேண்டுமோ அவர்களின்  எதிர்ப்பு வாக்குகளை பிரிப்பது மட்டுமே நோக்கமாக இருந்திருக்கிறது.

கூட்டணி என்றால் எத்தனை இடங்கள் என்பதை தாண்டி எதிரியை வீழ்த்துவது  ஒன்றே நோக்கமாக இருக்க வேண்டும்.

அதில் இடங்கள் பற்றிய குறைகளை காரணம் காட்டி கூட்டணியை  முறிப்பது நோக்கம் பழுது என்றாகும்.

இன்று வீழ்த்தப் பட வேண்டிய ஆட்சி இந்த எடப்பாடியின் ஆட்சி என்றால் அதை அடைய எத்தனை வேண்டுமானாலும் விட்டுக்  கொடுக்க கூட்டணி கட்சிகள் தயாராக இருக்க வேண்டும்.

வலுவான கூட்டணி அமைய எதிர்க்கட்சிகள் ஒத்துழைக்க வேண்டும் என்பதே மக்களின் எதிர்பார்ப்பு.

ஏழைகளுக்கு உதவ தமிழ்நாடு அரசு கொண்டு வந்த இலவச அரிசி திட்டம் அரசியல் காரணங்களுக்காக பயன்படுத்தப்படுவதாகவும் அது மக்களை சோம்பேறிகளாக்கி விட்டதாகவும் உயர்நீதிமன்றம் கருத்து தெரிவித்திருக்கிறது.

இதனால் வேலைக்கு ஆள் கிடைப்பது கூட அரிதாகி விட்டது என்றும் வேலைக்கு வட நாட்டில் இருந்து ஆட்களை இறக்குமதி செய்யும் அளவுக்கு நிலைமை போய்விட்டது என்றும் நீதிமன்றம் தெரிவித்தது.

நீதிபதிகள் கிருபாகரன் அப்துல்  குத்தூஸ் கொண்ட அமர்வு வழக்கு விசாரணையை இம்மாதம் முப்பதாம் தேதிக்கு தள்ளிவைத்து விட்டு அதற்குள் இந்த திட்டத்தை அமுல் படுத்த வறுமைக் கோட்டிற்கு கீழே இருப்பவர்கள் பற்றி கணக்கெடுப்பு எடுக்கப் பட்டதா என்பது குறித்த அறிக்கையை தாக்கல் செய்ய உத்தரவிட்டனர்.

இந்த வழக்கின் மூலமே இலவச அரிசி திட்டத்தின் கீழ் வழங்கப் பட இருந்த அரிசியை  கள்ள மார்க்கெட்டில் விற்பனை செய்ததாக கைது செய்யப்பட்ட ஒருவரை விடுவிக்க போடப்பட்ட மனுவின் மீதான விசாரணையின் போதுதான் உருவானது.

தமிழக அரசு ஆண்டுக்கு ரூபாய் 2110 கோடி இந்த திட்டத்திற்கு செலவழிக்கிறது.  இது பொது மக்களின் வரிப்பணம். இதற்குப் பதில்  வேறு அவசியமான திட்டங்களுக்கு இந்த பணம் பயன்படுத்தப் படலாமே என்றும் அவர்கள் கருத்து தெரிவித்தனர்.

நீதிமன்றத்தின் இந்த கருத்தால் எப்படியும் எல்லாருக்கும் இலவச அரிசி திட்டம் இனி சாத்தியம் இல்லை என்றே தோன்றுகிறது .

ஒட்டு வாங்கும் ஒரு திட்டமாகவே இது செயல்படுத்தப்பட்டு வருகிறது. அது மட்டுமல்ல. கொடுப்பது கடினம் என்றால் நிறுத்துவது அதைவிட கடினம்.

நிறுத்தியவர்களை ஏழைகளுக்கு எதிரானவர்கள் என்று முத்திரை குத்த முடியும்.

1,96,16,093 கோடி குடும்ப அட்டைகளுக்கு 5 விதமான வகைகளில் பொருட்கள் வழங்கப் பட்டு வருகின்றன.

சில இடங்களில் இலவச அரிசியை வசதி உள்ளவர்கள் பெற்று அதை மற்றவர்களுக்கு கொடுத்து விடுவதாகவும் விற்று விடுவதாகவும் புகார் வருகின்றன.  எந்த திட்டமாக இருந்தாலும் கால வரையறையில் ஆய்வு செய்யப் பட்டால் மட்டுமே தவறுகளை திருத்த முடியும்.

திட்டத்தின் மைய நோக்கத்தையே சிதைக்கும் அளவு முறைகேடுகள் நடைமுறையில் இருப்பது உண்மைதானே?

சரியான நேரத்தில் நீதிமன்றம் தலையிட்டு தவறுகள் தொடரா வண்ணம் கடிவாளம் போட இருக்கிறது.

திருத்தப்பட வேண்டிய நல்ல திட்டம்.