பொதுமேடை

2022 க்குள் விவசாய விளைபொருட்களின் கொள்முதல்
விலையை இரட்டிப்பாக்குவதாக மோடியின் அறிவிப்பு இருந்தது.
இடையில் பெயரளவுக்கு கொள்முதல் விலையை உயர்த்தியது
அதிருப்தியை ஏற்படுத்தினாலும் தேர்தல் வரும்போதாவது
ஏதாவது உருப்படியாக செய்வார்கள் என்ற நம்பிக்கையும் இருந்தது.
ஆனால் டெல்டா பகுதியை பெட்ரோலிய மண்டலமாக அறிவித்து
விவசாயிகளை மறைமுகமாக விவசாயத்தில் இருந்து
வெளியேற்றும் நடவடிக்கையை மத்திய அரசு தொடர்ந்தது.

இந்நிலையில் இப்போது தமிழகம் முழுவதும் உள்ள நேரடி நெல் கொள்முதல்
நிலையங்களை மூட மத்திய அரசு உத்தரவிட்டு இருப்பதாக
தகவல் வெளியானது அதிர்ச்சி அலைகளை உருவாக்கி இருக்கிறது.
கடந்த ஆகஸ்டு 31ம் தேதி வரை கொள்முதல் செய்த நெல்லை அரைத்து
அரிசியாக தந்து விட்டு நெல் கொள்முதலை நிறுத்துமாறு மத்திய அரசு
அறிவுறுத்தி இருப்பதாக கூறப்பட்டது.

திடீர் என்று தஞ்சை மாவட்டத்தில் 59 கடலூர் மாவட்டத்தில் 49
விழுப்புரம் மாவட்டத்தில் 15 கொள்முதல் நிலையங்களும் மூடப்பட்டன.
தமிழகம் முழுவதும் 1500 கொள்முதல் நிலையங்களும்
டெல்டாவில் மட்டும் 600 கொள்முதல் நிலையங்களும் இயங்கி வருகின்றன.
கொடுமை என்னவென்றால் நெல்கொள்முதல் குவிண்டாலுக்கு ரூபாய் 1750 என்று
அறிவிக்கப் பட்டாலும் கொள்முதல் செய்வது என்னவோ
பழைய விலையான ரூபாய் 1550 க்குத்தான்.

இந்த நிலையில் தமிழக அரசின் அறிவிப்புகள் ஏமாற்றமளிப்பதாக இருக்கின்றன.
இவர்கள் மத்திய அரசின் முகவராகத்தான் செயல் படுகிறார்களாம் . இதில் சில
விதிமுறைகளை ஒட்டித்தான் இந்த மூடல்கள்.
அதாவது பராமரிப்பு பணிக்காக இந்த மூடல்கள் என்று
அமைச்சர் காமராஜ் விளக்கம் தருகிறார்.
கொள்முதல் செய்வதே குறிப்பிட்ட காலத்தில்தான்.
இடையில் உள்ள காலத்தில் இந்த பராமரிப்பு பணிகளை மேற்கொள்ளக் கூடாதா?
எங்கெல்லாம் நெல் வரத்து இருக்கிறதோ எங்கெல்லாம்
நேரடி கொள்முதல் நிலையங்கள் தோடர்ந்து செயல்படும்
என்றும் அவர் கூறியிருக்கிறார்.

கேள்வி ஏன் இருக்கும் நிலையங்களை மூடவேண்டும் என்பதுதான்.
ஏற்கெனெவே பல பிரச்னைகளால் நொடித்துப் போயிருக்கும் விவசாயிகளை
மீண்டும் சோதனைக்கு உள்ளாவது அரசுக்குக் நல்லதல்ல.
மாநில சுயாட்சியை வலியுறுத்தி ஆட்சி செய்பவர்கள்
மத்திய ஆட்சியை மட்டுமே நம்பி திட்டங்களை வகுப்பது சரியல்ல.
மத்திய அரசின் பங்கும் இருக்கட்டும்.
நீங்கள் சுயமாக விருத்தி செய்வதை அவர்கள் தடுக்க வில்லையே .
விவசாயிகளிடம் இருந்து எல்லாக் காலத்திலும்
சாகுபடி விளைபொருட்கள் கொள்முதல் செய்யப் படும்
என்று தமிழக அரசு உறுதியளிக்க வேண்டும்.
எதற்கும் மத்திய அரசை சாக்கு சொல்லும் போக்கை
கைவிடவேண்டும்.

பேரூர் ஆதீனம் சாந்தலிங்க ராமசாமி அடிகளார்
93 வயதில் மறைந்திருக்கிறார்.
மு க ஸ்டாலின், மருத்துவர் ராமதாஸ் , கி. வீரமணி ,
போன்றவர்களுடன் இராம. கோபாலனும் இரங்கல் செய்தி வெளியிட்டுள்ளார்.
கோவில் குடமுழுக்குகளையும் திருமணங்களையும்
தமிழ் முறைப்படி நடத்தி மாற்றத்தை ஏற்படுத்தியவர்.
அறநெறியும் சமய நெறியும் மாறாமல் வாழ்ந்த அவர்
தீண்டாமை ஒழிப்புக்காக குரல் கொடுத்தவர் என்பதிலிருந்தே
சமயம் சார்ந்திருந்தும் சீர்திருத்தக் கொள்கைகளில்
நம்பிக்கை கொண்டவர் என்பது புலனாகும்.

மதம் பேசினார் என்பதற்காக மட்டுமே ராம கோபாலன்
போன்றவர்கள் ஏற்றுக் கொண்டார்களே தவிர
அவரது சீர்திருத்தத்தை ஏற்றுக் கொண்டவர்கள் அல்ல.
தமிழ்க் கல்லூரி நடத்தி தமிழ் பரப்பினார் என்பது
கூடுதல் முக்கிய நினைவுப் பணி.
தமிழ் திருமணம் நடத்துவோர் குறைந்து கொண்டிருப்பது
கவலை அளிக்கிறது.

சீர்திருத்த திருமணம் என்ற பெயரில்
கடவுள் மறுப்பு திருமணம் நடப்பதில்லை.
அரசியல் தலைவர்களை முன்னிறுத்தும் திருமணங்கள் தான்
நடை பெற்று வருகின்றன.
திராவிட இயக்கங்கள் உண்மையான சீர்திருத்த திருமணங்களை
நடத்த வலியுறுத்த தொடங்கினால் மட்டுமே உண்மையான திருப்பம் ஏற்படும்.
கடவுள் மறுப்பு திருமணம் மட்டும் முக்கியமில்லை.
சாதி மறுப்பு திருமணங்கள் தான் மிகவும் முக்கியம் .

இட ஒதுக்கீடு வந்திராவிட்டால் இன்றைக்கு தாழ்த்தப்பட்டோராகவும்,
பிற்பட்டோராகவும், மிக பிற்பட்டோராகவும் இருப்பவர்கள் முன்னேறி இருக்கவே
முடியாது. இந்த அடிப்படை அறிவு எல்லாருக்கும் இருக்கிறது.
புதிய தமிழகம் கட்சி தலைவர் டாக்டர் கிருஷ்ணசாமிக்கு
இல்லாமல் போனதுதான் அதிர்ச்சியாக இருக்கிறது.
இட ஒதுக்கீட்டை ஒழிக்கத்தானே பார்ப்பனர்கள் போராடிக்கொண்டிருக்கிறார்கள் .
அவர்களுக்கு துணை போவதுபோல் இருக்கிறது கிருஷ்ணசாமியின் பேச்சு.

சமூக நீதியை தவறாக புரிந்து கொள்கிறோமாம்.
நூறு ஆண்டுகளுக்கு முன்பு ஒரே ஒரு சமுதாயம்
மேலாதிக்கம் செய்தது என்று ஒப்புக் கொள்ளும் கிருஷ்ணசாமி
ஒட்டு மொத்த சமுதாய முன்னேற்றத்துக்கு
அந்த ஒரு பார்முலாவை மட்டும் பயன் படுத்துவது சரியல்ல என்கிறார்.
ஏதோ ஒரு ஏற்பாடு அவரை இப்படி பேச வைத்திருக்கிறது என்று மட்டும் புரிகிறது.
பாராளுமன்ற தேர்தல் நெருங்க நெருங்க இன்னும் பலர்
எப்படியெல்லாம் பேசப் போகிறார்களோ?

முன்பே அவர் பா ஜ க வுடன் நெருங்குகிறார் என்று செய்தகள் வந்தன.
இப்போது உறுதி பட்டு விட்டது
இடஒதுக்கீடு வருவதற்கு முன் – பின் என்று புள்ளி விபரங்களை
அவர் ஆராய்ந்தாரா என்று தெரிய வில்லை.
ஆதிக்க சக்தியிடம் ஆட்பட்டு விட்டார் என்று மட்டும் தெரிகிறது.
இரண்டு கருத்துக்களை அவர் கூறியிருக்கிறார்.
அதில் இட ஒதுக்கீடு குறித்து அவர் கூறிய கருத்துக்கள் தான்
நமக்கு சரி என்று படவில்லை
காட்டிக்கொடுக்கும் வேலையை இதைவிட சிறப்பாக செய்யமுடியாது.
எல்லாரும் இட ஒதுக்கீடுக்காக போராடிக்கொண்டிருக்கும்போது
இவர் மட்டும் வேண்டாம் என்றால் அதற்கு என்ன பெயர்?
திருமாவளவனும் ஜான் பாண்டியனும் இதர தலித் தலைவர்களும்
ஒப்புக் கொள்வார்களா?

இன்றைக்கும் கூட இட ஒதுக்கீடு எந்த அளவு சாதித்திருக்கிறது
என்பதற்கு புள்ளி விபரம் வேண்டுமா வேண்டாமா?
சமுதாயத்தின் அனைத்து பிரிவினரும் சராசரியாக
ஐம்பது சதம் அளவுக்கு முன்னேறி சமமாகத்தான்
வாழ்கிறார்கள் என்றால் இட ஒதுக்கீடு தேவையில்லைதான்!
அந்த நிலை வந்து விட்டது என்று எதை வைத்து சொல்கிறார்?
கடுமையான கண்டனத்துக்கு உரிய கருத்து இது.

அடுத்து பள்ளன், காலாடி, கடையன் , குடும்பன், பண்ணாடி, தேவேந்திர குலத்தான்
ஆகிய ஆறு பேரையும் தேவேந்திர குல வேளாளர் என்று வகைப்படுத்தி
பட்டியல் வகுப்பிலிருந்து அவர்களை நீக்க வேண்டும் என்பது
அவரது அடுத்த கோரிக்கை.

இதில் ஜான் பாண்டியனும் இவரும் ஒரே கருத்தில் இருக்கிறார்கள்.
பொருளாதார ரீதியிலும் , சமுதாய ரீதியிலும், கல்வி ரீதியிலும்
இவர்கள் முன்னேறி விட்டார்கள் என்று இவர்களே ஒப்புகொண்டால்
பட்டியல் வகுப்பிலிருந்து நீக்க யாருக்கும் ஆட்சேபணை இருக்காது.
எஸ் சி என்ற முத்திரை முன்னேற்றத்துக்கு முட்டுக் கட்டையாக
இருக்கிறது என்ற இவர் கருத்தும் ஆராய்ச்சிக்குரியது.
அருந்ததியருக்கு உள் ஒதுக்கீடு கலைஞர் தந்த போது
இவர் எதிர்த்தது ஏன்? அவர்கள் மீது இவருக்கு அக்கறை இல்லையா?
அவர்கள் பங்கை அவர்களுக்கு கொடுப்பதில் உங்களுக்கு என்ன பிரச்னை?

ஒட்டு மொத்தமாக் சாதி ஒழிப்பு இலட்சியமாக இருக்க வேண்டும்
என்று சாதித் தலைவர்கள் ஒவ்வொரு முறையும் சொல்லிக்
கொண்டே இருக்கிறார்களோ அன்றுதான் அவரகள் மதிக்கப் படுவார்கள்.
தமிழர் என்று அனைவரும் இணைவோம் என்பதே இறுதி இலட்சியம்
என்பதை இவர்கள் சொல்லிக் கொண்டே இருக்க வேண்டும்.!
இல்லைஎன்றால் சாதியை வைத்து தங்கள் இருப்பை செல்வாக்கை
தக்க வைக்க முயற்சிக்கிறார்கள் என்ற பழி உங்கள் மீது தங்கி விடும்.

திமுகவில் அனுமதித்தால் ஸ்டாலின் தலைமையை ஏற்க அழகிரி தயாராம் . கலைஞர் இருக்கும் வரை ஏதும் செய்யாமல் மறைந்த பின் கட்சியை காப்பாற்ற வருகிறேன் என்று வரும் அழகிரி செய்யும் காரியங்கள் நல்லதற்கல்ல. வெளியில் இருந்து கொண்டே இப்படி மிரட்டுகிறாரே, உள்ளே விட்டால்? அவரிடம் இருக்கும் அத்தனை பேரும் தி மு க வின் தொண்டர்கள் தான். எல்லாரும் அவர் திமுக வை விட்டு விலகினால்கூட நாங்கள் கூட போகமாட்டோம் என்பவர்கள்தான்.

செப்டம்பர் ஐந்தாம் தேதி அழகிரி கூட்டும் அமைதிப் பேரணி எந்த நோக்கத்திற்காக ? பதவி வேண்டாமாம். கட்சியில் அனுமதித்தால் போதுமாம். இன்று திமுக வில் கருப்பசாமி பாண்டியனும் , முல்லைவேந்தனும் திமுக தலைவர் ஸ்டாலின் முன்னிலையில் இணைந்திருக்கிறார்கள். கட்சியில் சேருவது என்றால் அதற்கு முறை இல்லையா? கடமை கண்ணியம் கட்டுப்பாடு எல்லாம் கட்சியில் நுழைபவர்களுக்கு வேண்டாமா? அதெல்லாம் தெரியாதவரா அழகிரி? கட்சியில் அனுமதிக்கும் முன்பே திமுக ட்ரஸ்ட்டில் ஸ்டாலின் மனைவிக்கும் மருமகனுக்கும் என்ன வேலை என்று கேட்கும் அழகிரி உள்ளே வரும் நோக்கம் எல்லாருக்கும் தெரியும்.

கட்டுச் சோற்றில் பூனையை சேர்த்துக் கட்டினால் என்ன ஆகும்? சோதனைகளை வெற்றிகரமாக சந்தித்து வரும் திமுக அடுத்த சோதனையையும் தாண்டி செல்லும் . எந்த அளவுகோளிலும் அடங்காத அழகிரி அதிக பட்சம் செய்யப் போவது துரோகம். அதை செய்யாதவர்கள் தான் குறைவு. ஏராளமான துரோகங்களை சந்தித்து தான் இன்று திமுக வலிவுடன் முன்னேறுகிறது. சேருவது வலிவு சேர்க்கத்தான் என்றால் யாரும் வரவேற்கத்தான் செய்வார்கள். அதுவே பலவீனமாக்கும் என்றால் ? எதையும் தாங்கும் வலிமை கொண்டு திமுக தலைமை இயங்கி வருகிற நேரத்தில் இதையும் தலைமை வலிவோடு எதிர்கொள்ளும் என்பதே தொண்டர்களின் எதிர்பார்ப்பு.

வைரமுத்துவின் கள்ளிக்காட்டு இதிகாசம் சாஹித்ய அகாடமி பரிசு பெற்றது.

அந்த நூல்  23 இந்திய மொழிகளில் மொழி பெயர்க்கப் பட்டு வருகிறது  என்பது வரவேற்கத் தக்க செய்தி.

கூடுதலாக சாஹித்ய அகாடெமிக்கு  அதன் இந்தி மொழிபெயர்ப்பில் உருவான கள்ளிக்காட்டு இதிகாசம் நூலுக்காக இந்த ஆண்டின் சிறந்த இந்தி புத்தக விருது  கிடைத்திருக்கிறது .

Nagaphani Van Ka Itihaas –  என்பது இந்திப் புத்தகத்தின் பெயர்.

இந்த விருதை இந்திய வர்த்தக தொழில் கழகம் வழங்கி உள்ளது.

நமது சிந்தனை தமிழ் கூறும் நல்லுலகத்தின் உள்ளே மட்டும் நின்று விடாமல் பல மொழிகளுக்கும் பரவுவதுதான் சிறப்பு.

அந்த வகையில்  தமிழ் சிந்தனையை பல மொழிகளுக்கும் கொண்டு சென்ற  வைரமுத்து பெருமைக்குரியவர்.

வாழ்த்துக்கள்.