பொதுமேடை

மீனாட்சி அம்மன் கோவிலின் வசந்தராயர் மண்டபத்தில் உள்ள  36  கடைகள் தீ விபத்தில் சேதம் அடைந்து விட்டன.

தீ தடுப்பு உபகரணங்கள் தயாராக இல்லை  என்பது வெளிச்சத்துக்கு வந்தது.    தீயணைப்பு இயந்திரங்கள் உள்ளே சென்று  வேலை செய்ய முடியவில்லை.       கோவில் பரிகாரத்துக்கு உள்ளே கடைகள் இருக்க கூடாது என்று  2006 ம் ஆண்டே தமிழக சுற்றுலா துறை பரிந்துரைத்து தகுந்த மாற்று இடமும் தேர்ந்து எடுக்கப்பட்டு முறையாக பணிகள் தொடங்கப் படாமல் தாமதம் ஆனதால் இந்த இழப்பு ஏற்பட்டு இருக்கிறது..

நிர்வாக அதிகாரியின் செயல் திறன் குறையா அல்லது கடைக்காரர்கள் திருஷ்டி பரிகாரத்துக்கு கொளுத்திய சூடத்தில் இருந்து  எழுந்த தீ தான் விபத்துக்கு காரணமா என்பது விசாரணையில் தான் தெரியும்.

விசாரணை தேவை என்பதிலும் தொடர் நடவடிக்கை தேவை என்பதிலும் யாருக்கும் எந்த  ஆட்சேபணையும் இருக்க முடியாது.

ஆனால் எதெற்கெடுத்தாலும் அரசு ஆலயத்தை விட்டு வெளியேற வேண்டும் என்ற கோரிக்கை வைப்பதை பா ஜ க வும் இந்து முன்னணி பார்ப்பனர்களும் வாடிக்கையாக வைத்திருக்கிறார்கள்.     ஆம்.   பாஜகவின்  எச்  ராஜாவும் இந்து முன்னணியின் ராம கோபாலனும் இந்த கோரிக்கையை எழுப்பி இருக்கிறார்கள்.

இப்போது இந்து ஆலயங்கள் இந்துக்கள் கையில்தானே இருக்கிறது.    வேறு எந்த இந்துக்கள் கையில் ஒப்படைக்க வேண்டும்?     திமுக ஆனாலும் அ தி மு க ஆனாலும் இந்துக்கள் தானே.    பார்ப்பனீய எதிர்ப்பு கொள்கை உடையவர்கள் இந்துக்கள் அல்ல என்று சொல்ல யாருக்கு உரிமை இருக்கிறது?

பார்ப்பநீய ஆதரவு ஆட்கள் மட்டுமே இந்துக்கள் என சான்றிதழ் தரும் உரிமை பா ஜ க வுக்கும் இல்லை. வேறு யாருக்கும் இல்லை.

உங்களை நன்றாக புரிந்தவர்கள் தான் தமிழ் இந்துக்கள்.

எனவே அரசை ஆலயத்தை விட்டு வெளியேறும் கோரிக்கையை இனி எவரும் எழுப்பக்  கூடாது.    அப்படி எழுப்புபவர்கள் மீது நடவடிக்கை பாயும் என்ற நிலைமையை ஆட்சியாளர்கள் உருவாக்க வேண்டும்.

அப்போது மட்டுமே இவர்கள் திருந்துவார்கள்.

பாரதியார் பல்கலை கழக துணைவேந்தர் கணபதி முப்பது லட்சம் லஞ்சம் வாங்கிய வழக்கில் கைது செய்யப்பட்டு சிறையில் அடைக்கப்  பட்டிருக்கிறார்.

துணை வேந்தர் நியமனங்களில் கோடிகளில்  லஞ்சம் கொடுத்து பதவி பெருகிறார்கள் என்ற குற்றச்சாட்டு பல ஆண்டுகளாக இருந்து வருகிறது.

ஆனாலும் யாரும் இதை  தடுத்து நிறுத்த முனைந்ததில்லை.    ஏன்?     எல்லாருக்கும் இதில் பங்கு இருந்திருக்கிறது.

இத்தனை கோடி லஞ்சம் கொடுத்து வந்தவன் எந்த நம்பிக்கையில் கொடுக்கிறான்?    அதை விட பல மடங்கு சம்பாதிக்க  முடியும் என்ற நம்பிக்கையில் தானே?

அதை நிறுத்த என்ன செய்திருக்கிறார்கள்.?

துணைவேந்தர் களுக்கு இருக்கும் நியமன அதிகாரம் தான் இதற்கு அடிப்படை.   தமிழ் நாட்டில் இருக்கும்  19  அரசு பல்கலை கழகங்களிலும் இதே நிலவரம்தான்.

பதவி நியமனம், பணி  இட மாறுதல் , போன்றவற்றில்  ஒவ்வொரு காரியத்திற்கும் லட்சங்களில் பேசப்படும் பேரம்தான் ஊற்று .

அனைத்திலும் வெளிப்படையான நடைமுறை அமுலில் இருந்தால் இந்த பேரத்திற் கெல்லாம் தேவை இருக்காதே?

ஆக இந்த ஊழல் என்பது எல்லா மட்டத்திலும் நிலை பெற்றிருக்கிறது.

இந்த ஊழல் ஒருமட்டத்தில் மட்டும் நிலை பெற்றிருக்க முடியாது.

அமைச்சரவைக்கு இதில் எந்த பங்கும் இல்லையா?   அமைச்சருக்கு என்ன பொறுப்பு?   செயலாளர் தரும் வழிகாட்டுதல் களையும் மீறி துணை வேந்தர் செயல் பட்டிருக்கிறார் என்றால் அதில்  யார் யாருக்கு  பங்கு இருக்கிறது. ?  கல்வித்துறை செயலாளர் தான் இதில் முழுப் பொறுப்பு ஏற்க வேண்டும்.

இதில் முழுமையான விசாரணை இல்லாமல் ஒரு துணை வேந்தர் மீது மட்டும் நடவடிக்கை என்றால் அதில் எந்த அர்த்தமும் இல்லை.

எந்த பல்கலையிலும் இனி இத்தகைய ஊழல் நடை பெற கூடாது.

அதற்கான வழிமுறைகளை உடனடியாக வகுப்பதுதான் உடனடி தேவையே  தவிர   ஒரு குற்றவாளியை மட்டும் தண்டிப்பது அல்ல.

கல்வித்துறையில் நிலவும் இந்த ஊழல் ஒழிக்கப் படும்வரை எந்த சீர்திருத்தமும் செய்ய முடியாது.