பொதுமேடை

அமைச்சர் ராஜேந்திர பாலாஜி பாலில் தனியார் நிறுவனங்கள் கலப்படம் செய்கிறார்கள் என்று குற்றம் சாட்டிய பிறகு ஆய்வுக்கு சென்ற மாதிரிகள் குற்றச்சாட்டை நிரூபித்த மாதிரி தெரியவில்லை.

இந்நிலையில் பால் முகவர்கள்  சங்க செயலாளர் பொன்னுசாமியை அவர் ஒரு ப்ரோக்கர் என்று  அமைச்சர் பேசினார்.     குற்றச்சாட்டை நிரூபிக்க வில்லை  என்றால் அமைச்சர் ராஜிநாமா செய்ய வேண்டும் என்று பொன்னுசாமி  பேட்டி கொடுக்கிறார்.

விமர்சித்த திமுகவின் முன்னாள் அமைச்சர் வைகை செல்வனை அவர் ஒரு அரசியல் விபச்சாரி என்றும் ஐநூறு ரூபாய் கொடுத்தால் என்ன வேண்டுமானாலும் பேசுவார் என்றும் பேட்டி கொடுத்தார் ராஜேந்திர பாலாஜி.

பதிலுக்கு வைகைசெல்வன் ராஜேந்திர பாலாஜி ஒரு பசை தடவி போஸ்டர் ஓட்டும் ஆள் என்றும் இன்னும் அவர் முதிர்ச்சி அடைய வில்லை என்றும் சேறு என்றும் சந்தனமாகாது என்றும் தான் தகுதியில்லாத அவரோடு சண்டையிட தயாராக இல்லை என்றும் திருப்பி சாடுகிறார்.

ரஜினிகாந்த் அரசியலுக்கு வரமாட்டார் என்று பேட்டியளிக்கும் பா  ஜ க வின் சுப்பிரமணிய சாமி

” அவன் அரசியலுக்கு வரமாட்டான் ”  என்று ஒருமையில் பேசுகிறார்.

தமிழக அரசியலின் தரம் எங்கே போய்கொண்டு இருக்கிறது. ?

நான்காம் தர மேடை  பேச்சாளர்கள் எல்லாம் பெரிய பதவிகளுக்கு வந்த வினை !

முதல்வர் என்று ஒருவர்  இருக்கிறாரா?    அவருக்கு  தன் அமைச்சர்களை கண்டிக்கும் தைரியம் வரவே வராதா?

அரி என்ற பாராளுமன்ற உறுப்பினர் தம்பிதுரையை கண்டிக்கிறார்.   வெற்றிவேல் அரியின் மீது பாய்கிறார். உட்கட்சி குழப்பம் எல்லையை தாண்டிக்கொண்டு இருக்கிறது.

எடப்பாடியோ எதையும் கண்டு கொள்ளாமல் தன் பாட்டுக்கு செயல் பட்டு கொண்டிருக்கிறார்.

யார் கட்டுப் பாட்டிலும் யாரும் இல்லை என்ற நிலை இங்கே .     அவர்கள் கையில் ஆட்சி  இருக்கிறது.       மக்களுக்கு யார் பாதுகாப்பு?

முதல்வர் பழனிசாமி மௌனம்  கலைக்கட்டும்??!!

ரஜினி அரசியலுக்கு வருவாரா என்று இருபத்தி ஐந்து ஆண்டுகளாக கேள்வியை மட்டுமே எழுப்ப வைத்து கலைத்துறையில் சுப்பர் ஸ்டாராக வலம் வந்தது போதும் உண்மையிலேயே வந்து பார்த்தல் என்ன என்று சிந்திக்க த்துவங்கி விட்டார் அவர்.

அமித் ஷா சொல்றார் ரஜினி செய்றார் என்று புது வசனம் எழுத வேண்டியதுதான்.

தமிழருவி மணியன்  அர்ஜுன் சம்பத்  போன்ற புல்லுருவிகள் நீண்டு கொண்டே போகிறது. அதில் திருமாவும் சேர்ந்தால் கூட  ஆச்சரியமில்லை.

தலித் ஆதரவாளர் என்ற உருவாக்கம் கபாலி படம் முதல் உருவாகி விட்டது.

தலித், உயர் சாதி இந்துத்துவ சக்திகளின் ஆதரவு மற்றும் சிதறிக் கிடக்கும் அதிமுக  உதிரிகள் என்ற மூன்றின் கட்டமைப்பு வெற்றியைக் கொடுக்கும் என்ற திட்டம் உருவாகியிருக்கிறது .

எந்த அளவு வெற்றி கிடைக்கும் என்ற உத்தரவாதம் இல்லை என்றாலும் மத்தியில் பா ஜ க ஆட்சியில் இன்னும் சில காலம் மோடியின் செல்வாக்கு குறையாது என்ற  மதிப்பீடு மற்ற பலன்களை பெற்றுக் கொள்ள முடியும் என்ற நம்பிக்கையை வளர்த்திருக்கிறது.

முதல்வர் இல்லாவிட்டாலும் ராஜ்ய சபா உறுப்பினர் மத்திய அமைச்சர் என்று உத்தரவாதம் அளிக்க கூடும்.    ரஜினி மயங்க கூடும்.

எடப்பாடி அணி  தினகரன் அணி  அதற்குள் திவாகரன் அணி  ஓ   பி எஸ் அணி      தீபா அணி என்று எத்தனை அணிகள் திரண்டாலும் அத்தனை பேரும் ஒன்றில் மட்டும் வாய் பேசா மௌனிகளாகவே மாறிப் போகிறார்கள்.

அது பா ஜ க வுக்கு ஆமாம் சாமி போடுவது.    காலில் விழுந்து கிடப்பது. ஒரு வார்த்தை மத்திய அரசை எதிர்த்து குரல் கொடுக்காமல் இருப்பது.

மொத்தத்தில் அடித்தாலும் அழாமல் இருப்பது.

இந்த அடிமைகளில் யார் நல்லவர்கள் என்று ஏன் பார்க்க வேண்டும்?

எல்லாருமே  ஏதோ ஒரு வகையில் மத்திய அரசின் கழுகுப் பார்வையில் இருக்கிறார்கள்.

சி பி ஐ  வருமான வரித்துறை அமலாக்கத் துறை என்ற மூன்றும் பா ஜ க வின் அரசியல் வியூகங்களை அமுல் படுத்தும் அதிகார மையங்கள்.  எல்லாருமே இவற்றிற்கு அஞ்சுகிறவர்கள்.

இந்த நிலை நீடிப்பது நல்லதல்ல.

சட்ட மன்றத்தில் ஒட்டு வாங்க பண பேரம் பேசியதாக வந்த வழக்கில் வழக்கு  பதிவு செய்ய தேர்தல் கமிஷன் போட்ட உத்தரவை அமுல் படுத்த வில்லை.

தானாகவே அடித்துக் கொண்டு அழியப் போகும் ஆதாயக் கட்சியாக அ தி மு க மாறி விட்டது.

அது எவ்வளவு சீக்கிரம் நடக்கிறதோ நல்லது.

கொஞ்ச நஞ்சம் அந்த கட்சியில் ஒட்டிக கொண்டிருக்கும் திராவிட இயக்க பற்றாளர்கள் மறு பரிசீலனை செய்யுங்கள்.   இன்னும் ஏன் ஒட்டிக கொண்டிருக்க வேண்டும்.    எங்கே போக வேண்டுமோ அங்கே போகலாமே!!

காலம் தாழ்த்துவது கூட நாட்டிற்கு செய்யும் கேடு என்பதை உணருங்கள்.

இதுவரை இல்லாத வகையில் சசிகலா அணி அமைச்சரவை  மீது நம்பிக்கை வாக்கு பெற வேண்டிய சூழ்நிலையில் கூவத்துரில் தங்க வைக்கப் படுவதற்கு முன் எம் எல் ஏக்களுக்கு  இரண்டு முதல் பத்து கோடி வரை பேரம் பேசப் பட்டதாக இரண்டு எம் எல் ;ஏக்கள் பேசுவதாக இரண்டு தொலைக்காட்சி நிறுவனங்கள் நடத்திய ஸ்டிங் ஆபரேஷன் என்ற நடவடிக்கை வெளிப்படுத்தியது.

இன்று சட்ட மன்றம் கூடியபோது இது பற்றி விவாதம் நடத்த சபாநாயகர் அனுமதி மறுத்து விட்டார்.

அ தி மு க தரப்பு அமைதியாக அமர்ந்திருக்க தி மு க மட்டும் விவாதம் நடத்த கேட்டு போராடியது.

வழக்கு நிலுவையில் இருப்பதை காரணம் காட்டி சபாநாயகர் அனுமதி மறுத்தார்.      ஏன் அவர்களிடம் ஒரு வாக்குமூலம் பெறுவதைகூட தடுக்க வேண்டும்?

மூன்று அணியாக அ தி மு  க  மாறிய பிறகு அதன் ஸ்திரத் தன்மை வெகுவாக பாதிக்கப் பட்டுள்ளது.

பா ஜ க வின் கைப்பாவையாக மாறிவிட்ட அ தி மு க அரசு எப்போது  வேண்டுமானாலும் கவிழலாம்.

கவிழ்கிறதோ ஆள்கிறதோ  பண ப்  பேரம் விசாரிக்கப் பட்டே ஆக  வேண்டும்.

விசா பெற்று ஒரு திருமண விழாவிற்கு சென்ற வைகோவை மலேசியா அரசு துணை பிரதமர் அலுவலக உத்தரவு என்று சொல்லி அனுமதிக்க மறுத்து இந்தியாவுக்கு திருப்பி அனுப்பி இருக்கிறது.

ஒரு இந்தியருக்கு இழைக்கப் பட்ட அநீதியாக இந்திய அரசு நினைத்தால் உடனே நடவடிக்கை எடுத்திருக்கும்.

தமிழர்கள் அதிலும் ஈழ ஆதரவு தமிழர்கள் என்றாலே மோடியின் அரசுக்கு இரண்டாம் தர இந்தியராகத்தான் தெரிகிறது.

ஸ்டாலின் ,திருநாவுக்கரசு உள்ளிட்ட தமிழக தலைவர்கள் கண்டித்திருக்கிறார்கள் .

மத்திய அரசின் அங்கீகாரம் இல்லாமல் இது நடந்திருக்க முடியாது.    இலங்கையில் வழக்கு இருக்கிறது என்றால் ஏன் விசா வழங்க வேண்டும்?    அப்போது தெரியாதா வழக்கு இருப்பது?

இந்திய அரசு  தனக்கு ஏதும் தெரியாது என்று சொல்ல முடியுமா?

இந்தியாவில் தமிழர்கள் இரண்டாம் தர குடிமக்கள் ஆகி வருகிறார்கள் என்ற உணர்வு வலுவாகிக் கொண்டிருக்கிறது.

ஆமாம்.   தமிழக அரசு என்று ஒன்று இருக்கிறதே??!! எங்கே அது?

குடியரசுத் தலைவர் தேர்தலில் பா ஜ க வுக்கு வெறும் 22000 வாக்குகள் மட்டுமே தேவைப் படுகிற நிலையில் அ தி மு க வசம் உள்ள  59000 வாக்குகளை மிரட்டி வாங்க நினைக்கிறது பா ஜ க .

அதனால்தான் அ தி மு க  எங்களுக்கே வாக்களிக்கும் என்று பொன் ராதாகிருஷ்ணனும் இல. கணேசனும் பேட்டி கொடுக்கிறார்கள்.     அதி மு க தரப்பில் மறுப்பதற்கு கூட ஆளில்லை.

பா ஜ க யாரிடம் வேண்டுமானாலும் ஆதரவை கோரலாம்.   அது உரிமை.    அ தி  மு க கூட அதை பரிசீலிக்கலாம்.    ஏனென்றால் ஏற்கெனெவே தி  மு  க காங்கிரஸ் கூட்டணியில் இருப்பதால் எங்களுக்கு வேறு வழியில்லை என்று கூறலாம்.   ஆனால் இந்தியாவின் மூன்றாவது பெரிய இடத்தில் உள்ள ஒரு கட்சியை தன் தலைமை யாரிடம் உள்ளது என்பது தொடர்பாக பிரச்னையாக இருக்கும்போது பா ஜ க முந்திக் கொண்டு அவர்கள் ஆதரவு எங்களுக்குத்தான் என்றால் அவர்கள் எங்களை மீறி எதுவும் செய்ய முடியாது என்று பா ஜ க அறிவிக்கிறது என்றுதானே பொருள்.

நமது கவலையெல்லாம் நீ யாருக்காவது ஆதரவு தந்து விட்டுப் போ.

இந்தப் போக்கு சரிதானா?     இதே நிலை நீடித்தால் அ தி மு க அரசு அறிவிக்க வேண்டிய அனைத்தையும் பா ஜ க வே அறிவிக்கும் சூழ்நிலை வராது என்பதற்கு என்ன உத்தரவாதம். ?

நடப்பது பா ஜ க வின் அடிமைகளின் ஆட்சி என்பது போல் தோற்றம் உருவாகி விட்டது.

தமிழர்களின் உரிமைகள் பறிபோகும் என்ற அச்சம் உருவாகி விட்டது.

உட்கட்சி சண்டை போட்டுக் கொண்டிருக்கும் அதி மு க தலைவர்களில் இது பற்றி சிந்திக்க ஒருவர் கூடவா இருக்க மாட்டார்?

நமக்கு கிடைத்த அடிமைகள் நல்லவர்கள் . வாயைத் திறந்து பேச மாட்டார்கள் என்ற கர்வத்தில் இருக்கிறது பா ஜ க .

போதாதற்கு பா ஜ க என்ன தீண்டத் தகாத கட்சியா என்று அமைச்சர் ராஜேந்திர பாலாஜி கேட்கிறார்.    ஆக பாதை விரிக்க தயாராகி விட்டார்கள்.

நமக்குத்தான் அச்சமாக இருக்கிறது.     இன்னும் என்னவெல்லாம் பறிபோகுமோ ?