பொதுமேடை

நிர்பயா சம்பவங்கள் தமிழ் நாட்டிலும் தொடர்ந்து நடக்க ஆரம்பித்து விட்டன.

ஓடும பேருந்தில் நிகழந்த கொடுமையான நிர்பயா கற்பழிப்பு வழக்கு நாட்டையே உலுக்கியது.     அதன் பின் நிர்பயா நிதி என்ற ஒன்றையே உருவாக்கி இதுபோல் பாதிக்கப் படும் பெண்களுக்கு வழங்க ஏற்பாடு செய்யப் பட்டுள்ளது.

வடநாட்டில் மட்டும் நடந்து வந்த இந்த காட்டுமிராண்டித்தனம் தமிழ் நாட்டிலும் தொடர்ந்து நடந்து வருவது அதிர்ச்சியளிக்கிறது .

தண்டணை விரைவாகவும் அச்சுறுத்தும் வகையிலும் இருந்தால்தான் குற்றவாளிகளுக்கு பயம் இருக்கும்.

தன்னை கற்பழித்த சாமியாரின் ஆணுறுப்பை அறுத்து எறிந்த பெண்ணின்  துணிச்சல் எல்லாருக்கும் வர வேண்டும்.      சட்டத்தை கையில் எடுத்துக் கொள்வது தவறு என்று கூட சிலர் கூறினார்கள். ஆனாலும் பொதுவில் எல்லாரின் ஆதரவையும் பெற்றது அந்த பெண்ணின் நடவடிக்கை.

இந்தக் கயவர்களுக்கு அளிக்கப் படும் தண்டணை விரைவாகவும் இனி யாரும் இப்படி நடக்க அஞ்சும் வகையிலும் இருக்க வேண்டும்.

அமைச்சர் ராஜேந்திர பாலாஜியின் தனியார் பால் நிறுவனங்கள் மீதான குற்றச்சாட்டு பல ஊகங்களுக்கு வித்திட்டிருகிறது.

தயிரையே பாலாக மாற்றுகிறார்களாம்.    ஹைட்ரஜன் பெராக்சிட்,   க்ளோரின்     மற்றும் யூரியா போன்ற பொருட்களை கலந்து விற்பதால் பதினைந்து நாட்கள் வரை தனியார் பால் கெடுவதில்லை யாம்.

அமைச்சர் சொல்வதுபோல் ஐந்து நாட்களில் உறை ஊற்றவில்லை என்றால் பால்  கெட்டுப்போக வேண்டும்.     கெட்டால்தான் பால்.

தனியார் நிறுவனங்கள் குற்றச்சாட்டுகளை மறுத்தாலும் ஆய்வுக்குப் பின்தான் அவர்கள் குற்றம் அற்றவர்களா என்பது தெரியும்.

இன்று மாதவரம் பால் பண்ணையில்  தனியார் பால் ஆய்வுக்கு உட்படுத்தப் பட்டு முடிவுகள் வந்ததில் அவைகள் ரசாயனம் கலந்து இருப்பது உறுதிப் பட்டு இருப்பதாக அமைச்சர் கூறுகிறார்.

மிரட்டி பணம் பறிக்கும் உள்நோக்கம் கொண்ட குற்றச்சாட்டா என்றெல்லாம் கூட பலர் விமர்சிக்கிறார்கள்.    அவைகளில் உண்மை உள்ளதா என்பது இனி அரசு எடுக்கும் நடவடிக்கைகள் பொறுத்தே தெரிய  வரும்.

தனியார் பால் நிறுவனங்கள் மூடப் பட வேண்டிய நிலை வந்தால் அதனால் பெறும் பயன் அடையப் போவது ஆவின் நிறுவனம்.     எனவே போட்டி நிறுவனம் சுமத்தும் பொய் குற்றச்சாட்டாக இது அமைந்து விட கூடாது.

நீதி மன்றங்கள் இதில் நிச்சயம் தலையிடும்.   அப்போது அரசு சட்டப் படி நடந்திருக்கிறதா என்பது பரிசீலிக்கப் படும்போது உண்மை தெரிந்து விடும்.

கலப்படம் உண்மையென்றால் தண்டனை தவறக்கூடாது.

இருபத்தி ஐந்து ஆண்டுகளாக ஒரு நடிகர் அரசியலுக்கு வருவாரா மாட்டாரா என்ற விவாதம் நடந்து வருவதே ஒரு அவமானம்.

அரசியலுக்கு வருவது என்றால் அவருக்கென்று ஏதாவது ஒரு அரசியல் சார்ந்த கொள்கை இருக்கவேண்டும்.   இதுவரை ஏதாவது இருந்திருக்கிறதா?

நல்லவர் .  சிறந்த நடிகர். இதய சுத்தி கொண்டவர்.   பணம் சம்பாதிக்க அரசியலுக்கு வர வேண்டும் என்ற எண்ணம்  இல்லாதவர்.       ஆனால் எந்த கொள்கையிலும் தன்னை அடையாளப் படுத்திக்கொள்ளாதவர் .

இது போதாதா அரசியலுக்கு வருவதற்கு என்று கேட்கும் தமிழர்கள் இருக்கத்தான் செய்வார்கள்.

அவர் தமிழரல்ல.   கன்னடர் அல்ல. மராட்டியருமல்ல.   இந்தியர்.

தமிழரல்லாத அடையாளம் தானே தமிழர்களை ஆள்வதற்கு வேண்டும்.   அதைத்தானே இதுவரை வரலாறு காட்டியிருக்கிறது.

எனவே ரஜினிக்கு இந்த ஆசை துளிர் விட்டிருந்தால் ஆச்சரியப் பட ஒன்றுமில்லை.

ஆளுமை மிகுந்த கலைஞர் ஓய்வில்.   ஜெயலலிதா  மறைந்து விட்டார்.   தமிழக அரசியலில் வெற்றிடம் கண்டிருப்பார் ரஜினி.

புலி  வருது புலி வருது என்ற எச்சரிக்கை குரல்கள் எப்போதுமே பொய்த்து விடும் என்று சொல்ல முடியாது. என்றாவது உண்மையாகலாம்.

தமிழ் நாட்டின் தலை எழுத்து அப்படி இருந்தால் யார்தான் தடுக்க முடியும்.?

எத்தனை கேவலங்களைத் தான் தமிழன் தலையில் சுமக்க வேண்டும் என்று இறைவன் எழுதி இருக்கிறானோ?

தமிழ்ச் சாதித் தலைவர்கள் எங்காவது போய் சுவற்றில் முட்டிக் கொள்ளட்டும்!

அவர்கள் தயவு செய்து அரசியலில் இருந்து விலகி கொண்டாவது கொஞ்சமாவது தன்மானம் உண்டு என்று நிரூபிக்கட்டும் .

சக தமிழர்களை ஏற்றுக் கொள்ளாத நண்டு சாதி தலைவர்கள் இருக்கும் வரை தமிழர்கள் சாதியிலிருந்து எந்த தலைவனும் தோன்றப் போவதில்லை.

தகுதி தனக்கு மட்டுமே உண்டு என்ற அகந்தை எல்லா தமிழ் தலைவர்களுக்கும் இருக்கிறது.

எதிரியையும் அடையாளம் காணத் தெரியாத இவர்கள் எப்படி தமிழர் உரிமைகளை காப்பார்கள்?

கோவாவிலும் அருணாச்சல பிரதேசத்திலும் மக்கள் தீர்ப்பையே மாற்றி எழுதியவர்கள் பா ஜ க வினர். அவர்கள் பார்வை தமிழகம் நோக்கி திரும்பியிருக்கிறது .

விலை போகத் தயாராக இருப்பவர்களையும் காட்டிகொடுக்க தயாராக இருப்பவர்களையும் மிரட்டலுக்கு அஞ்சி ஆட்சியில் இருப்பவர்களையும் ஒருங்கிணைத்து தமிழ் நாட்டில் காலூன்ற தயாராக இருக்கிறது பா ஜ க.

மோடி-அமித்ஷா  அணுகுமுறைகள் தமிழகத்தை சாதி மதத்தால் பிளவு படுத்த முனையும் என்பதில் சந்தேகம் இல்லை.

அகில இந்தியாவையும் வெற்றிகண்ட பல பேரரசுகள் தக்கண பீடபூமியை தொட்டதில்லை.   மகத மௌரிய முகலாய பேரரசுகளின் கதை இதுதான்.     ஆங்கிலேயர்கள் மட்டுமே அதை உடைத்தவர்கள்.    இப்போது இந்துத்துவ பேரரசை நிர்மாணிக்கும் முயற்சியில் இருக்கும் மோடி-அமித்ஷா கூட்டணி திராவிடத்தின் மற்ற மூன்று கூறுகளை வென்றாலும் தமிழ் நாட்டையும் வெல்ல முடியுமா என்பதை வரலாறு தான் விடை கூற வேண்டும்.

தமிழரை தமிழரே ஆள வேண்டும் என்பது அநியாயமான ஆசையா?

மாற்று மொழிக்காரர் ஆளும்  அக்கிரமம் கர்நாடகத்தில் ஆந்திராவில் கேரளாவில் நடந்த துண்டா ?

ரஜினி சூப்பர் ஸ்டாராக மக்கள் மனதில் நிலைத்து விட்டவர்.   அதில் எதிரிகளே கிடையாது.   அரசியலுக்கு வந்தால் நிறைய எதிரிகள் வருவார்கள்.     அவர்களை எதிர்கொண்டு மக்கள் சேவை செய்ய  வேண்டும் என்ற கட்டாயம் ரஜினிக்கு உண்டா?

மக்கள் தொண்டு செய்ய அரசியலை தவிர வேறு வழிகளே இல்லையா?

மக்கள்  தலையில் ஏறி நின்று மட்டுமே அவைகளுக்கு சேவை செய்ய வேண்டுமா?

கடைசி காலத்தை நிம்மதியாக கழிக்காமால் அரசியலில் நுழைந்து போராடுவதில்தான் அவருக்கு மகிழ்ச்சியா?

ரஜினி அவர்களே,

அரசியலுக்கு வருகிறீர்களா  மகிழ்ச்சி!!!

வரவில்லையா  மகிழ்ச்சியோடு கலந்த நிம்மதி.

இரட்டை இலை சின்னம் பெற தேர்தல் கமிஷனுக்கு லஞ்சம தர முயன்ற தாக தினகரன் மீதான வழக்கில் பல மர்ம முடுச்சுக்கள் அவிழ்க்கப் பட வேண்டும்.    அப்போதுதான் உண்மை வெளிவரும்.      அவிழ்க்கப் படாமலேயே கூட போகலாம்.   அதன் பெயர் தான் மோடி வித்தை.

அதிமுக இரண்டாக உடைந்தது என்பதே தவறு.        பெரும்பான்மை நிர்வாகிகள்  சட்டமன்ற உறுப்பினர்கள், பாராளுமன்ற உறுப்பினர்கள்  எடப்பாடி பழனிசாமி பக்கம்தான் இருக்கிறார்கள்.      இதை அளவுகோலாக வைத்துதான் சமாஜ்வாதி கட்சி பிரச்னையின் போது சைக்கிள் சின்னத்தை அகிலேஷ் யாதவுக்கு தேர்தல் கமிஷன் ஒதுக்கியது.       அந்த அளவுகோளில் சாதாரணமாக இரட்டை இலை சின்னம் அவர்களுக்கே கிடைத்திருக்க வேண்டும்.

அடிப்படை உறுப்பினர்கள் மட்டுமே பொதுசெயலாளரை  தேர்ந்தெடுக்க வேண்டும் என்பது வேறு பிரச்னை.   இரண்டையும் சேர்த்து  குழப்பி பிரச்னையை ஏற்படுத்தியது தேர்தல் கமிஷன்.

தானாகவே கிடைத்திருக்க வேண்டிய சின்னத்தை கோடிக்கணக்கில் பணம் கொடுத்து பெற தினகரன் முயற்சித்தார் என்பதே கேலிக்குரிய குற்றச்சாட்டு.       அவர் அப்படிப்பட்டவர்தான் என்பது வேறு.     ஆர் கே நகர் தேர்தலில் அவர் வாக்காளர்களுக்கு பணம் கொடுத்தார் என்பது எல்லாரும் அறிந்த உண்மை.    ஜெயலலிதா என்ன பணம் கொடுக்காமல் வெற்றி பெற்றாரா?    பணம் கொடுக்கப் பட்டதை தடுக்க முடியவில்லை என்று ஒப்புதல் வாக்குமூலம் கொடுத்தது தேர்தல் கமிஷன்.

எல்லாம் போகட்டும். ஒரு குற்றம் எப்போது தண்டிக்கப் பட வேண்டிய ஒன்றாக முழுமையடைகிறது. ?

குற்றம் புரிய வேண்டும் என்ற மனநிலை உருவாக வேண்டும் , குற்றம் புரிய தேவையான தயாரிப்புகளை செய்ய வேண்டும் , குற்றம் புரிய முயற்சிக்க வேண்டும் , குற்றத்செயலை நிகழ்த்த வேண்டும்  . இந்த நான்கு நிலைகளை தாண்டிய பிறகுதான் ஒரு செயல் தண்டிக்கத் தக்க குற்றமாகும்.

தேர்தல் கமிஷனை லஞ்சம கொடுத்து வாங்க முயன்றால் அந்த தேர்தல் கமிஷன் அதிகாரி யார்?    அவரிடம் யார் தொடர்பு கொண்டார்கள்?    அதற்கு அவர் ஒப்புதல் கொடுத்தாரா?   ஒப்புதல் கொடுத்திருந்தால் அவரும் இந்த குற்றத்தில் சம்பத்தப்பட்ட ஒரு குற்றவாளியாகிறார்.  ஏன் அவர் பெயரை வெளியிட வில்லை?

தேர்தல் கமிஷன்  அதிகாரியை சம்பத்தப் படுத்தாமல் தினகரனை இந்த வழக்கில் குற்றவாளியாக காட்டவே முடியாது.

ஹவாலா மூலம் பணம் பரிவர்த்தனை என்பது சட்ட விரோதமானது.    ஆனாலும் பல நூற்றாண்டுகளாக அமுலில் உள்ளது.   ஒழிக்க முடியுமா என்பது விபசாரத்தை ஒழிக்க முடியுமா என்பதை ஒத்தது.    தண்டிக்கலாம்.   ஆனால் ஒழிக்கவே முடியாது.

இதுவரை வெளிவந்துள்ள தகவல்கள் அடிப்படையில் இன்னும் குற்றம் உருவாகவே இல்லை. எப்படி நீதிமன்றம் இதையெல்லாம் அனுமதிக்கிறது என்பது வேறு புதிர்.

நம்பக்கூடிய வகையில் எதையுமே தேர்தல் கமிஷன் நடந்து கொள்ளவில்லை.

பா ஜ க வின் அரசியல் சித்து விளையாட்டுகளுக்கு   தேர்தல்  கமிஷன்  துணை  போவது எல்லாருக்கும் தெரிகிறது.         அவரரும் அவரவர் அரசியலுக்கு தகுந்தாற்போல் ஆதரிக்கவோ கண்டிக்கவோ செய்கிறார்கள்.

கடைந்தெடுத்த ஒரு ஏமாற்றுப்  பேர்வழியை  , சுகேஷ் சந்திரசேகர் என்ற நபரை, கையில் எடுத்துக்கொண்டு இந்த அரசியல் நாடகத்தை மோடி அரசு நடத்துவதுதான் சகிக்க வில்லை.       வங்கிகளை பல கோடிகளில் ஏமாற்றியவன்,  தனக்கும்  தினகரனுக்கும் எந்த தொடர்பும் இல்லை என்று ஏன் பத்திரிகைகளுக்கு பேட்டி கொடுக்க வேண்டும்?

தமிழகத்தில் காலூன்ற மோடியும் அமித் ஷாவும் எந்த எல்லைக்கும் செல்வார்கள் என்பதற்கு ஒரு சின்ன ஆரம்பம்தான் தினகரன் கைது  – வழக்கு காட்சிகள்.

பார்க்கலாம் – இந்த நாடகம் இன்னும் எத்தனை திருப்பங்களை உருவாக்கும் என்று?

மத நல்லிணக்கத்திற்கு கோட்டை அமிர்  பெயரில் விருதை வழங்கி வருகிறது தமிழக அரசு.

அதே கோவையில் இந்து முஸ்லிம் பயங்கரவாதிகள் தொடர்ந்து இயங்கி வருகிறார்கள்.

ஒரு இந்து முன்னணி பிரமுகர் கொலை வழக்கில் சிறை சென்று வந்த பாருக் என்ற இளைஞர் சிறையில் இருந்து வெளியே வந்தபின் நாத்திகப் பாதைக்குத் திரும்பி பகுத்தறிவு  பேச ஆரம்பித்தார்.

கடவுள் மறுப்புக் கொள்கைகளை தன் இணைய தள முகவரியில் எழுதி வந்தார்.

கூட இருந்து முஸ்லிம் நண்பர்களே அவருக்கு விரோதிகளாக மாறி அவரை கொன்று போட்டிருக்கிறார்கள்.

கர்நாடகத்திலும் மகராஷ்டிரா விலும் குல்பர்கி , தபோல்கர் என்ற இருவரை நாத்திகம் பேசியதற்காக இந்துத்துவ பயங்கரவாதிகள் கொலை  செய்தார்கள். இப்போது தமிழகத்திலும்  அதே கலாசாரம் வேரூன்ற முயற்சிக்கிறது.

வெறியர்கள் எல்லா மதங்களிலும் இருக்கிறார்கள் என்பதற்கு வேறு  சாட்சியம் தேவையில்லை.

முஸ்லிம் மத அமைப்புகள் தான் முதலில் இதை கண்டித்திருக்க வேண்டும்.

காவல் துறை மெத்தனம் காட்டக் கூடாது.

நடிகர் தனுஷ்  மேலூர் கதிரேசன் மகனா இயக்குனர்  கஸ்தூரி ராஜாவின் மகனா?

இப்படி ஒரு வழக்கு இதுவரையில் நடிகர்கள் சம்பத்தப் பட்டு வந்ததில்லை.

கதிரேசன் கேட்பதெல்லாம் வாழ்க்கை படி.     பணம் பறிப்பதற்காக யாரோ சொல்லிக் கொடுத்து இப்படி ஒரு பொய் வழக்கு என்று தனுஷ் சொல்கிறார்.       பொய் என்றால்  சிறைக்குப் போகவேண்டும் என்பது தெரியாமலா வழக்குப் போட்டிருப்பார்கள்?

பள்ளிக் கல்விச் சான்றிதழ்கள்  அதில்  காணும் மச்சங்கள் ,என்றெல்லாம் விசாரணை போய்க்கொண்டிருக்கிறது

மருத்துவர்கள் சான்றிதழ்கள் பிரச்னையை  தீர்க்கும் என்றால் அதிலும் கேள்விகள்.    லேசர் சிகிச்சை மூலம் மச்சங்கள் அழிப்பு என்று  புகார்.

சான்றிதழ்களில் அவர் தலித் என்றும் இருக்கிறதாம்.     கஸ்தூரி ராஜா தான் தலித் என்று சொல்லிக்கொள்ள வில்லை.

டி ஏன் ஏ பரிசோதனைக்கு தனுஷ் ஒப்புக்கொள்ளவில்லை.   ஏன்?

இருவரில் ஒருவர் சொல்வது பொய்.       யார் அவர்?

ரஜினிகாந்தின் மருமகன் மீது இப்படி  ஒரு விசாரணை நடப்பதை அவரே சங்கடத்துடன் தான் பார்த்துக் கொண்டிருக்க முடியும்.

தனுஷ் போன்ற நம்ம வீட்டுப் பையன் என்ற பெயரை எடுத்த நல்ல கலைஞனை சுற்றி இப்படி ஒரு விவாதம் நடப்பதை அவரது நலம் விரும்பிகள் விரும்ப மாட்டார்கள்.

விசாரணையில் யார் மகன் தனுஷ் என்றுதான் தீர்ப்பு வர முடியும்.

இன்னொரு கேள்விக்கு என்ன விடை?

இரு தரப்பு தாக்கல் செய்திருக்கும் சான்றிதழ்கள் படி இரண்டு பிள்ளைகள்  படித்துக் கொண்டிருந்திருக்க வேண்டும்.

ஒருவர் தனுஷ் .   மற்றொருவர் யார்?   அவர் எங்கேயிருக்கிறார்?  ஏன் அவர் இன்னும் வெளிப்படவில்லை. ?   ஏன் அவர் கண்டுபிடிக்கப் பட வில்லை.?    அவர் மறைந்திருக்கிறாரா?   மறைத்து வைக்கப் பட்டிருக்கிறாரா ?    அல்லது இரண்டில் ஒரு சான்றிதழ் பொய்யா?

கவுண்டமணி -செந்திலின் வாழைப்பழக் காமெடி போல் கேள்வி இருந்தாலும் உண்மை  அதில்தான் ஒளிந்திருக்கிறது.

அந்த இன்னொரு தனுஷ் எங்கே?