பொதுமேடை

எழுவர் விடுதலை பற்றி மாநில அரசின் அமைச்சரவை தீர்மானம் ஆளுனரை கட்டுப் படுத்தும் என்று உச்ச நீதி மன்ற தீர்ப்புகள் எல்லாம் இருக்க  அதையெல்லாம் விட்டு விட்டு மாநில அரசின் தீர்மானம் சைபர் மதிப்பு கொண்டது என்று மத்திய அரசின் வழக்குரைஞர் நீதி மன்றத்தில் தெரிவித்த அவலம் நடந்தேறியிருக்கிறது .

அதற்கு மாநில அரசின் வழக்கறிஞர் கடும் எதிர்ப்பை தெரிவிக்காததுதான் வேதனை.

அரசியல் சாசன பிரிவு 161 படி விடுதலை செய்வது என்பது மாநில அரசின் விருப்பத்துக்கு உட்பட்டது என்ற நிலைப்பாட்டில் எடப்பாடி அரசு மாறிவிட்டது.     

பரிந்துரை செய்ததோடு எங்கள் வேலை முடிந்தது.   இனி ஆளுநர் என்னவேண்டுமானாலும் செய்யலாம் என்ற நிலைப்பாடு நம்மை நாமே விற்று விட்ட நிலை போன்றது.

மாநில அரசும் ஆளுநரும் மத்திய அரசும் உச்சநீதி மன்றமும் எல்லாம் சேர்ந்து  கொண்டு நடக்கும் நிகழ்வுகளை பார்த்தால் இந்த நாடகம் இப்போது முடிகிறது போல் தோன்றவில்லை.

முதல்வர் நேரில் சென்று பிரதமரை பார்த்தால் வேண்டுகோள் விடுத்தால் ஒருவேளை காரியம் நடக்கலாம் என்று விசாரணை அதிகாரியாக இருந்த ரகோத்தமன் கூறுகிறார். அப்படி என்றால் இது அரசியலின் ஒரு அங்கமாக ஆக்கப் பட்டு விட்டதா?

நாங்கள் தான் விடுதலை செய்தோம் என்று  வாக்கு அரசியல் செய்ய  முயற்சிக்கிறதா மத்திய அரசு?

நடக்கும் நிகழ்வுகள் மத்திய மாநில அரசுகள் மீதான மக்களின் வெறுப்பை  தூண்டத்தான் செய்யும்.

மாநில அரசின் உரிமைகளை  விட்டுக்கொடுக்கும் அளவுக்கு எடப்பாடி  அரசு தயாராகி விட்ட நிலையில் மாற்றம் கண்ணுக்கு தெரியவில்லை.

வி பி சிங் கொண்டுவந்த பிற்பட்டோருக்கு 27 % இட ஒதுக்கீடு தான் எல்கே அத்வானி ராம ஜென்ம பூமி ரத யாத்திரையை தொடங்க காரணமாக இருந்தது என்று சொல்வார்கள்.

மண்டல் கமிஷன் அறிக்கையை செல்லாதது ஆக்க கமண்டலத்தை  எடுத்தார் அத்வானி என்று விமர்சித்தார்கள். இது வரலாறு.

வாய்ப்பு கிடைக்கும் போதெல்லாம் பிற்பட்டோர் இடஒதுக்கீட்டில் கைவைத்து அவர்களை கீழே தள்ள முயற்சிப்பது பாஜக வுக்கு பிடித்தமான விளையாட்டு.

அந்த முயற்சியில் பிற்பட்டோரில் க்ரீமி லேயர் என்ற பிரிவுக்கு இட ஒதுக்கீடு கிடையாது என்று ஒரு  வரையறை கொண்டு வந்தார்கள். ஆண்டுக்கு எட்டு லட்சத்துக்கு மேல் வருமானம் இருந்தால்  இட ஒதுக்கீடு கிடையாது. அதில் ஏனைய வருமானம் என்று இருந்ததை மாத வருவாயை யும் விவசாய வருவாயையும் இப்போது சேர்த்திருக்கிறார்கள். இதனால் கணிசமான பிற்பட்டோர் இட ஒதுக்கீட்டு சலுகைகளை பெற முடியாமல் போய்விடும் என்று பாஜக நம்புகிறது.

ஏற்கெனெவே பல நீதிமன்றங்கள் இது தொடர்பாக தீர்ப்புகள்  சொல்லி  இருந்தாலும் ஏதாவது செய்து பிற்பட்டோருக்கான இட ஒதுக்கீட்டில் கைவைப்பதை குறியாக கொண்டு செயல்படுகிறது பாஜக அரசு.

இதுவும் நீதி மன்றம் செல்லும் என்று நம்புவோமாக.

உயர்நீதி மன்ற உச்ச நீதி மன்ற நீதிபதிகள் நியமனத்தில் இட ஒதுக்கீடு  செயல் படுத்தப் படுகிறதா என்றால்  இல்லையே? 

மத்திய பிரதேச உயர்நீதி மன்றத்தில் இதுவரை தாழ்த்தப் பட்டவர் ஒருவர் கூட நீதிபதியாக நியமிக்கப்  படவில்லை என்ற செய்தியை  ஒருவர் சொன்னார்.

அது உண்மையாக இருக்கும் பட்சத்தில் நீதித்துறை செயல்படுவதை சந்தேகிக்காமல் எப்படி இருப்பது?

இப்படிக் கேட்பதே ஒரு குற்றமாகக் கூட கருதப் படலாம்.

நீதிமன்றத்தின் மாண்பை காக்காத எந்த நாடும் சட்டத்தின் படி ஆளப்படும் நாடாக இருக்க முடியாது.

ஆனால் இன்றைக்கு  நீதிமன்றங்கள்  தீர்ப்பு  தருவதில் காட்டும் தாமதம் எப்படியெல்லாம் அரசியலின் போக்கை மாற்றி அமைக்கிறது என்பதை நினைத்தால் இந்தக் கேள்வியில் குற்றம் இருப்பதாக தெரியவில்லை.

ஜெயலலிதா வழக்கில் வாதங்கள் முடிவடைந்து உடனே தீர்ப்பு வந்திருந்தால் தமிழ்நாட்டின் அரசியல் மாறியிருக்கும். அவர் மறைந்து சசிகலா முதல்வர் ஆக முனைந்தவுடன் வந்தது உடனே தீர்ப்பு.  சிறைக்குப் போகிறார் சசிகலா. முன்பே வந்திருந்தால் ஜெயலலிதாவும் சேர்ந்து சிறைக்குப் போயிருப்பார். அரசியல் மாற்றம் அப்போதே வந்திருக்கும். யார் கையில் அதிகாரம் வந்திருக்கும் என்பதெல்லாம் இப்போது சொன்னால் அவை ஊகங்களே.

தினகரனின் அதிமுக  18  பேர் ஆட்சிக்கு எதிராக வாக்கு அளிக்க அளிக்கவில்லை.  அவர்கள்  தகுதி நீக்கம் செய்யப்  படுகிறார்கள்.  எதிராக வாக்களித்த 11 பேர் அமைச்சர்களாக இருக்கிறார்கள்.  பாமரனுக்கு இந்த கணக்கு புரியவில்லை.

மூன்றாண்டு களுக்குப் பின் உச்ச நீதிமன்றம் சபாநாயகர் தீர்ப்பு சொல்லட்டும் என்று வழக்கை  முடித்து வைக்கிறது.  சபாநாயகர்  இன்னும் ஆறு மாதத்தில் தீர்ப்பு  சொல்லி அதற்கு மேன்முறையீடு உச்சநீதி மன்றம் சென்றால் அதற்குள் இந்த ஆட்சியின் ஆயுள் முடிந்து விடும்.

மக்கள் பிரதிநிதிகளின்  வழக்குகளை விசாரிக்க சிறப்பு நீதிமன்றம் அமைத்தும் விரைந்து முடிவுகள் வர வில்லையே?

அப்பாவு வழக்கில் வாக்குகள் எண்ணி முடித்து  அதை வெளியிட உச்சநீதி மன்றம் எடுத்துக்  கொள்ளும் நேரம் முடிவதற்குள் ஆட்சியின் ஆயுள் முடிந்து விடும்.

குடிஉரிமை திருத்த சட்டம் மக்கள் தொகை கணக்கெடுப்பு  சட்டம் தொடர்பாக விசாரிக்கவே உச்சநீதி மன்றம் தயங்கு கிறது.  முதலில் போராட்டங்கள் ஓயட்டும்  பின்பு  விசாரிக்கிறோம் என்கிறார்கள்.   எப்போது  போராட்டம் முடிவது எப்போது நாட்டு மக்களுக்கு சட்ட நிலைமை  தெரிவது?

நீதித்துறையின் மாண்பை காக்க விரைந்து செயல்படுவது ஒன்றே வழி? அது  நீதித்துறையின் கையில்தான் இருக்கிறது.

குடிஉரிமை திருத்த சட்டத்துக்கு எதிராக திமுகவும் அதன் கூட்டணி கட்சிகளும் ஒரு கோடி கையெழுத்து வாங்க இயக்கம் ஒரு வாரம் நடத்துகின்றனர்.

சட்டமான பிறகும் அதை எதிர்த்து இயக்கம் நடத்துவது ஒன்றும் குற்றமல்ல.  அதுவும் ஒரு ஜனநாயகத்தில் வேறு எப்படித்தான் எதிர்ப்பை பதிவு செய்வது?

சட்டம் கட்டுப் படுத்தும் என்றாலும் அதை திரும்ப பெற எதிர்கட்சிகள் வலியுறுத்துமானால் அதற்கு மக்கள் ஆதரவு இருக்கும் பட்சத்தில் ஆளும் கட்சியே மறுபரிசீலனை செய்யலாம் அல்லவா?

 கேரளா, மேற்கு வங்கம், பஞ்சாப், ராஜஸ்தான் மற்றும் மத்திய பிரதேச அரசுகள்  குடிஉரிமை திருத்த  சட்டத்துக்கு எதிராக அமைச்சரவையில்  தீர்மானம் நிறைவேற்றி இருக்கின்றன. அமுல் படுத்த மாட்டோம் என்கிறார்கள். எல்லாரையும் டிஸ்மிஸ் செய்து விடுவீர்களா? 

அமைச்சர் பாண்டியராஜன் அமைச்சராக இருக்கிறார். அவருக்கு ஜனநாயக உரிமைகள் பற்றி தெரியாது என்று சொல்ல முடியாது.

தெரிந்தும் கையெழுத்து இயக்கத்தை மத்திய அரசு எப்படி அனுமதிக்கிறது என்று கேட்பாரேயானால் அவர் சர்வாதிகாரத்தை ஆதரிக்க ஆரம்பித்து விட்டார் என்றுதான் பொருள். அதிமுகவை முழுவதும்  மண்டியிட வைக்க முயல்கிறார் பாண்டியராஜன்.

மௌனமாக இருந்தால் அதற்கு இபிஎஸ் -ஒபிஎஸ்  பச்சை கொடி காட்டி விட்டார்கள் என்றுதான் பொருள்.